चितवनमा ८ सवारीसाधन दुर्घटना गराउने निजी कलेजका बस चालकले गाँजा सेवन गरेको पुष्टि

५ भदौ, काठमाडौं । पूर्व–पश्चिम राजमार्गस्थित चितवनको टिकौली जंगलमा गत हप्ता ८ वटा सवारी साधनलाई ठक्कर दिने निजी कलेजका बसका चालकले लागुपदार्थ गाँजा सेवन गरेको तथ्य फेला परेको छ । 

गएको साउन ३१ गते भरतपुरबाट पूर्वतर्फ जाँदै गरेको गैंडाकोटस्थित निजी क्षेत्रबाट संचालित अक्सफोर्ड कलेजको बसले विपरीत दिशातर्फ आउँदै गरेको शव बोकेको जिप, ४ वटा मोटरसाइकल र २ स्कुटरलाई ठक्कर दिएर दुर्घटना गराएका थिए । बस आशिष परियारले चलाएका थिए ।

दुर्घटनामा २० जना घाइते भएका थिए । ति घाइतेमध्ये केहीको अहिले पनि भरतपुरका विभिन्न अस्पतालमा उपचार भइरहेको छ । चालक परियार नवलपरासीको गैंडाकोट–९ का २६ वर्षका रहेको र उनले गाँजा सेवन गरेर बस चलाएको उनको स्वास्थ्य परीक्षणबाट पत्ता लागेको छ । परियारको (टिएचसी) परीक्षण गराइएको थियो । त्यसमा गाँजा सेवन गरेको पाइएको जिल्ला प्रहरी कार्यालय चितवनले जानकारी दिएकाे छ ।

चालक परियारलाई प्रहरीले सवारी अंगभंगको मुद्दा चलाएको छ । चालकको स्वास्थ्य अवस्थाबारे समाचार लेख्ने स्थानीय संचारमाध्यमलाई कलेजका संचालकहरुले धम्की समेत दिएका थिए । 

यो पनि पढ्नुहोस