प्रधानमन्त्रीलाई कालोझण्डा देखाएकाे आरोपमा गिरफ्तार गरिएका वैद्यका कार्यकर्ता रिहा

५ भदौ, काठमाडौं । प्रधानमन्त्री प्रचण्डलाई कालो झण्डा देखाएको आरोपमा प्रहरीले मोहन वैद्य नेतृत्वको पार्टीका कार्यकर्तालाई पक्राउ गरेको छ । 

सोमबार सुर्खेतबाट काठमाडौं फर्कने क्रममा बाँकेको नेपालगञ्ज पुगेका प्रधानमन्त्रीलाई नेकपा (क्रान्तिकारी माओवादी)का कार्यकर्ताहरुले कालोझण्डा देखाएका थिए । सो क्रममा प्रहरीले आधा दर्जनको संख्यामा कार्यकर्ताहरुलाई गिरफ्तार गरेको थियो । एमसीसी परियोजना सम्झौता कार्यान्वयन नगर्न माग गर्दै कालो झण्डा देखाएका हुन् । 

वैद्य नेतृत्वको पार्टीले एमसीसी सम्झौताको सुरुवातकाल देखिनै विरोध गर्दै आइरहेको छ । गत वर्ष फागुनमा संसदबाट दुई तिहाइले पारित गरिएको एमसीसी सम्झौता भदौबाट सम्झौता कार्यान्वयन सुरु भएको छ । सोको जानकारी दरबारमार्गस्थित नेपाल कार्यालय रहेको एमसीसीए कार्यालयले जनाएको छ ।

पाँच वर्ष लगाएर नेपाल सरकारले एक चौथाई व्यहोर्ने गरी अमेरिकाले मिलिनियम च्यालेन्ज कर्पोरेस (एमसीसी)ले ५५ अर्ब रुपैयाँ विद्युत प्रसारण लाइन र ग्रामिण सडक निर्माणको प्रयोजनमा खर्च गर्ने गरी सहयोग गर्ने भनिएको छ ।

सरकारले तोकिएको रकम व्यहोर्न नसके सहयोग रकम फिर्ता लैजाने भन्ने सर्त राखिएको छ । वैद्यले एमसीसी विकासको नाममा अमेरिकी सैन्य शक्ति विस्तारको योजना लुकेको भन्दै खारेजीको माग गर्दै आइरहेको छ । गिरफ्तार कार्यकर्ता सबै जना सोमबार नै रिहा भइसकेका छन् ।