शिव श्री हाइड्रोपावर ३० करोड ८८ लाख घाटामा, इपीएस २० रुपैयाँ ९२ पैसा ऋणात्मक

५ भदौ, काठमाडौं । गत आर्थिक वर्षको चौथो त्रैमाससम्म आइपुग्दा शिव श्री हाइड्रोपावरले ३० करोड ८८ लाख रूपैयाँ नोक्सान व्यहोर्नु परेको छ । यो कर तिर्नुभन्दा अघिको नोक्सान हो । अघिल्लो वर्ष यसै अवधिमा कम्पनीले ३६ करोड ३६ लाख रूपैयाँ नोक्सानी व्यहोरेको थियो । अघिल्लो वर्षको तुलनामा नोक्सानी घटेको हो । विद्युत बिक्रीबाट हुने आम्दानी बढेसँगै नोक्सानीमा केही कमी आएको हो । 

अघिल्लो वर्ष २४ करोड ४६ लाख रूपैयाँ विद्युत बिक्रीबाट आम्दानी गरेकोमा गत वर्ष बढेर ३५ करोड २० लाख रूपैयाँ आम्दानी गरेको छ । असार मसान्तसम्म आइपुग्दा यसको प्रति शेयर आम्दानी २० रूपैयाँ ९२ पैसा ऋणात्मक छ । प्रतिशेयर नेटवर्थ ४० रूपैयाँ ४१ पैसा छ । चुक्ता पुँजी १ अर्ब ४७ करोड ६४ लाख रूपैयाँ छ । यसको जगेडा कोष ८७ करोड ९७ लाख रूपैयाँ ऋणात्मक छ ।