जबजको सान्दर्भिकता बढेको अध्यक्ष नेपालको निष्कर्ष (प्रतिवेदनकाे पूर्णपाठ)

५ भदौ, काठमाडौं । सरकार साझोदार दल नेकपा (एकीकृत समाजवादी)का अध्यक्ष माधवकुमार नेपालले तत्कालीन एमालेका महासचिव मदन भण्डारीले प्रतिवादन गरेको जनताको बहुदलीय जनवाद (जबज)को सान्दर्भिकता झनै बढेको बताएका छन् । 

मंगलबारदेखि काठमाडौंमा सुरू भएको पार्टीको छैठौं केन्द्रीय कमिटीको बैठकमा ४० पृष्ठ लामाे राजनीतिक प्रतिवेदन प्रस्तुत गर्दै अध्यक्ष नेपालले जबजको सन्दर्भ र महत्व बढेको र यसले नेपाली मौलिकताका समाजवादको ढोका खोल्न सार्थकता प्रदान गर्ने बताएका छन् । 

उनले प्रतिवेदनमा लेखेका छन्, ‘जनताको बहुदलीय जनवादमा सामन्तवादविरूद्ध अगाडि सारिएका राजनीतिक माग, नारा र मूल्य मान्यताहरू संविधानमा संस्थागत भएका छन् । यो उपलब्धीको पक्ष हो। जनताको बहुदलीय जनवाद सामन्तवादविरोधी कार्यक्रममात्र होइन, दलाल नोकरशाही पुँजीवादविरोधी कार्यक्रम पनि हो। यो राजनीतिक कार्यक्रममात्र पनि होइन, आर्थिक, सामाजिक र सांस्कृतिक रूपान्तरणको कार्यक्रमसमेत हो। यसले अगाडि सारेका आर्थिक, सामाजिक र सांस्कृतिक रूपान्तरणका कार्यक्रमहरू व्यवहारमा लागू भइसकेका छैनन् ।’

तर उनले जबजले नै समाजवाद पुर्याउन नसकिने, जनवादसम्म पुर्याउन सहज तुल्याउने बताए । जबजले राज्यसत्ता, कम्युनिष्ट आन्दोलन र पार्टीको लोकतान्त्रीकरणको मान्यता बोकेको बताए । समाजवादमा पुग्न जबजपछि पनि विभिन्न चरण पार गर्नुपर्ने अवस्था रहेको बताए । जबजलाई एमालेको मार्ग सिद्धान्त मान्दै आइरहेको छ । जबजका प्रतिवादक भण्डारीको २०५१ जेठ ३ गते चितवनको दासढुंगामा जिप खसालेर ज्यान लिइएको थियो । उनका हत्यारा भने अझै पत्ता लाग्न सकेका छैनन् ।

एमाले अध्यक्ष केपी शर्मा ओलीले एकांकी र स्वेच्छचारी शैली अपनाएको भन्दै २०७८ भदौ २ गते नेपालको नेतृत्वमा खनाललगायत नेताहरुको समूहले पार्टी विद्रोह गरेर भदौ ९ मा निर्वाचन आयोगमा नेकपा (एकीकृत समाजवादी) दर्ता गराएका थिए ।

उनीपछि बोलेका पार्टीका नेता झलनाथ खनालले भने एमालेले मार्गदर्शक सिद्धान्त मानेको जबजको उपादेयता सकिइसकेको बताएका थिए । खनालले पार्टीले वैज्ञानिक समाजवादी विचार लिनुपर्ने धारणा राखे । बैठक बिहीबारसम्म चल्नेछ ।