कांग्रेसले भदौ १० देखि २४ सम्म गर्ने भनेको दोस्रो चरणको जनतासँग कांग्रेस अभियान स्थगित

५ भदौ, काठमाडौं । नेपाली कांग्रेसको भदौ १० देखि २४ सम्म गर्ने भनिएको दोस्रो चरणको जनतासँग कांग्रेस अभियान स्थगित भएको छ । मंगलबार बिहान सभापति शेरबहादुर देउवा निवास धुम्बाराहीमा बसेको पदाधिकारी बैठकले दोस्रो चरणको अभियान स्थगित गर्ने निर्णय गरेको हो ।

भदौ १० देखि २४ सम्मका लागि नागरिक र समुदायसँग प्रत्यक्ष जोडिने गरि अभियान गर्ने पार्टी केन्द्रीय समिति बैठकले निर्णय गरेको थियो । संसद सुचारु हुने र वर्षाको पनि समयले भएकाले अभियान स्थगित गर्ने निर्णय भएको सहमहामन्त्री बद्री पाण्डेले जानकारी दिए । बैठकमा पहिलो चरणको अभियानको उपलब्धिबारे छलफल भएको थियो । 

यस्तै भदौ १५ भित्र भ्रातृ संस्थालाई पूर्णता दिने र विभाग गठन गर्ने पार्टीले निर्णय गरेको छ । विभाग गठनका लागि तयारीलाई निरन्तरता दिने कुरा भएको पाण्डेले बताए । उक्त अभियानका अर्को मिति आगामी दिनमा बस्ने बैठकबाट तय हुने उनको भनाइ छ ।

पदाधिकारीबीच भएको छलफलमा २० देखि ३० साउनसम्म भएको पार्टी संगठन सुदृढीकरण अभियानको समीक्षा भएको थियो । अभियानले कांग्रेसलाई गतिशील बनाउने छलफलको निष्कर्ष निकाल्दै पार्टी भ्रातृ संस्थालाई संगठन विस्तारका लागि व्यापक परिचालन गर्ने बारे पनि पदाधिकारी बैठकले निर्णय गरेको छ । पदाधिकारीको छलफल राष्ट्रिय राजनीतिभन्दा पार्टीको आन्तरिक विषयमै केन्द्रित भएको थियो ।