भारतबाट प्याज आउन बन्द, नेपालमा कालो बजारिया सल्बलाउँदै

५ भदौ, काठमाडौं । भारतबाट नेपाली बजारमा प्यान आउने क्रम बन्द भएको छ । भारतले गत शनिबारदेखि लागू हुने गरी प्याज निर्यातमा थप ४० प्रतिशत कर लगाएपछि निर्यात हुन नसक्दा नेपाली बजारमा प्याज आउन छाडेको हो । 

योसँगै व्यापारीले कालो बजारी चलाउन सुरु गरेका छन् । यसअघि सामान्य अवस्थामा आयात गरिएको प्याजको खु्द्रा भाउ प्रतिकेजी १२० रुपैयाँ पुर्याएका छन् । कालिमाटी फलफूल तथा तरकारी विकास समितिले आफ्नो वेभसाइटबाट प्याजलाई मूल्य सूची हटाएको छ । प्याज आयात हुन नसकेपछि मूल्य तोक्न कठिन हुँदा सूचीबाट हटाइएको हो । नेपाल भारतबाट दैनिक एक सय टन प्याज आयात हुँदै आएको थियो । आइतबार समितिले होलसेल मूल्य प्रतिकेजी ७८ रुपैयाँ तोकेका थियो । 

भारतले थप गरेको करमा प्याज खरिद गर्दा निकै महंगो पर्ने र नेपाली बजारमा आइपुग्दा उपभोक्ताले धान्नै नसक्ने तवरमा पुग्ने व्यापारीहरु बताएउँछन् । नेपाली उत्पादनले कुल खपतको करिब १२ प्रतशित मात्र धान्ने उनीहरु बताउँछन् । आयात रोकिएसँगै कालो बजारिया माध्यमबाट प्याज भित्रिने र बजारमा प्याजको भाउ उच्च हुने उनीहरुले बताए ।

आइतबार खुद्रा प्रतिकेजी ७० रुपैयाँ रहेको प्याज मंगलबार बिहान ११० पुगेको छ । प्याज व्यापारमा कालो बजारिया सल्बलाउन पुगेका छन् । सेटिङमा प्याज भित्र्याएर चर्काे मूल्यमा बिक्री गर्न लागेका हुन् । भारतले देशभित्रै प्याज अभाव हुन थालेकाे भन्दै निर्यात राेक्ने उद्देश्यले चर्काे कर लगाएकाे अन्तर्राष्ट्रय संचारमाध्यमहरूले जनाएका छन् ।