हुम्लामा नियमित उडान गर्न सर्वोच्चको अल्पकालीन आदेश

५ भदौ, काठमाडौं । हुम्ला जिल्लामा हवाई उडान नियमित गर्न सर्वोच्च अदालतले नेपाल नागरिक उड्डयन प्राधिकरणको नाममा अन्तरिम आदेश जारी गरेको छ । 

राष्ट्रिय तथा अन्तर्राष्ट्रिय हवाई उडानको नियमन प्राधिकरणले गर्दै आएको छ । प्राधिकरणले दिउँसो १२ बजेपछि हिमाली जिल्लाहरु उडानमा प्रतिबन्ध लगाउने निर्णय गरेपछि निर्णय खारेजीको माग गर्दै अधिवक्ता रामबहादुर शाहीले गएको साउन ३२ मा सर्वोच्चमा रिट परेको थियो । प्रतिबन्धका कारण हुम्लामा समयमा उपचार नपाएका कारण ४ बालकको ज्यान गएको थियो । रिटमा प्राधिकरणसहित ९ वटा निकायलाई विपक्षी बनाइएको थियो । 

रिट पक्षले माग गरेबमोजिम अन्तरिम आदेश जारी गर्नु नपर्ने भए कारण भएन बाटोको म्यादबाहेक १५ दिनभित्र लिखित जवाफ पेस गर्न विपक्षीहरुको नाममा आदेश भएको छ । न्यायाधीश हरिप्रसाद फुयालको एकल इजलासले उक्त अल्पकालीन आदेश भएकाे हाे ।

हुम्ला जिल्ला सडक सञ्जालबाट नजोडिएको कारण हवाई मार्गको मात्र भर पर्नुपर्ने अवस्था रहेकोमा औषधी उपचार गर्नु पर्ने बिरामी, अशक्त, गर्भावस्था, वृद्धावस्था जस्ता विशेष अवस्थामा रहेका व्यक्तिहरु तथा व्यवसायिक काम वा काम विशेषले आफ्नो ठाउँबाट नेपालगञ्ज तथा काठमाडौँ लगायतका क्षेत्रमा आवत–जावत गर्नुपर्ने बाध्यता छ । हवाई उडान नियमित नहुँदा हुम्लाबासी चर्को मारमा परेका छन् । 

साथै हुम्लामा हुने उडानको भाडा समेत पुनर्विचार गर्न आदेशमा भनिएको छ । काठमाडौंबाट एक जना व्यक्ति हुम्ला पुग्न ४ दिन लाग्ने र जान फर्किन २० हजार रुपैयाँसम्म लाग्ने गरिएको भनाइ हुम्लावासीको छ ।