सरकारमा पठाएका मन्त्रीको कामप्रति पार्टीले असन्तुष्टी जनाएपछि कांग्रेसका मन्त्रीहरुले गरे सामुहिक छलफल

५ भदौ, काठमाडौं । सरकारमा पठाएका मन्त्रीहरुले सोचअनुसार काम नगरेको भन्दै पार्टीबाट व्यापक असन्तुष्टि आएपछि  नेपाली कांग्रेसका मन्त्रीहरुले सामुहिक रुपमा बसेर छलफल गरेका छन् । पार्टीबाट पठाइएका मन्त्रीहरुको नेतृत्व सरकारको उपप्रधानमन्त्री एवं रक्षामन्त्री जिम्मेवारी सम्हालीरहेका पूर्णबहादुर खड्काले कांग्रेसका मन्त्रीहरुलाई रक्षा मन्त्रालयमा बोलाएर पार्टीको असन्तुष्टिबारे छलफल चलाएका हुन् । 

सरकारमा कांग्रेसको नेतृत्व गरेका खड्काले मंगलबार पार्टीबाट मन्त्री बनेका नेताहरुलाई रक्षा मन्त्रालयमा सरकारको काम कारबाहीका विषयमा कुराकानी गरेका थिए । सिंहदरबारस्थित रक्षा मन्त्रालयमा कांग्रेस ८ जना मन्त्रीले आफ्ना मन्त्रालयका काम र समस्याबारे एकअर्कामा समीक्षा गरेका छन् । मन्त्रालयका काममा भइरहेका ढिलासूस्ती र पार्टीले राखेको चासोकाबारे उनीहरुबीच छलफल भएको हो ।  

उपप्रधानमन्त्री खड्काको नेतृत्व भएको छलफलमा कानुनमन्त्री धनराज गुरुङ, परराष्ट्रमन्त्री एनपी साउद, स्वास्थ्यमन्त्री मोहनबहादुर बस्नेत, सहरी विकास मन्त्री सीता गुरुङ, खेलकुदमन्त्री डिगबहादुर लिम्बू र महिला तथा बालबालिका मन्त्री सुरेन्द्र आचार्य सहभागी भएका थिए । अर्थमन्त्री प्रकाशशरण महत भने क्यानडामा रहेकाले छलफलमा सहभागी भएका थिएनन् । कानुनमन्त्री धनराज गुरुङले अहिले भइरहेका काम र आगामी दिनमा गरिन काम, कानुनिर्माण लगायत समसामयिक राजनीतिक विषयमा छलफल भएको बताए । 

गत महिना भएको कांग्रेस केन्द्रीय कार्यसमिति बैठक र संसदीय दलको बैठकमा सरकारको कामको आलोचना भएको थियो । पछिल्लो समय सरकारले गरेको राम्रो कामको जस प्रधानमन्त्री पुष्पकमल दाहाल प्रचण्ड र उपप्रधानमन्त्री तथा गृहमन्त्री नारायणकाजी श्रेष्ठले लिने तर ल्हारक्याल लामाको नियुक्तिजस्तो विवादास्पद विषयको जिम्मा कांग्रेसले पनि बोक्नुपरेको केही नेताहरुले बताएका थिए ।

संसदीय दलको बैठकमा कांग्रेस उपसभापतिसमेत रहेका खड्काले लुम्बिनी विकास कोषको उपाध्यक्षमा ल्हारक्यालको नियुक्तिको विषयमा प्रधानमन्त्रीसँग असन्तुष्टि राखेको जवाफ दिएका थिए । उनले पार्टीको नीतिअनुसार कांग्रेसबाट सहभागि सवै मन्त्रीहरुले काम गर्नुपर्ने भन्दै आफुले गर्ने कामबारे पार्टीसँग सुझाव र सल्लाह लिर गर्न उनले निर्देशन दिएका थिए ।