प्रधानमन्त्री प्रचण्डको न्यूयोर्क भ्रमण स्वीकृत, ३ अर्ब २० करोड जापानी अनुदान लिने मन्त्रिपरिषदकाे निर्णय

६ भदौ, काठमाडौं । मन्त्रिपरिषद बैठकले प्रधानमन्त्री पुष्पकमल दाहाल ‘प्रचण्ड’को अमेरिकाकाे न्युयोर्क भ्रमण स्वीकृत गरेको छ ।

आज बिहान बसेको मन्त्रिपरिषद बैठकले परराष्ट्र मन्त्रालयको प्रस्तावमा प्रचण्ड नेतृत्वको नेपाली प्रतिनिधिमण्डलको भ्रमण स्वीकृत गरेको हो । मन्त्रिपरिषदको नियमित बैठक मंगलबार बस्न नसकेपछि आज बिहान बसेको थियो । 

संयुक्त राष्ट्रसंघको ७८ औं महासभामा सहभागी हुन प्रधानमन्त्री प्रचण्ड त्यसतर्फ जाँदैछन् । उनी न्यूयाेर्कबाटै चीन जानेछन् । बैठकले स्वर्गीय जेबी टुहुरेलाई जन गायकको उपाधि प्रदान गर्ने निर्णय समेत गरेको छ ।

अर्थ मन्त्रालयको प्रस्तावमा धितोपत्र सम्बन्धी ऐन २०६३ को दफा ११६ को उपदफा १ बमोजिम नेपाल धितोपत्र बोर्डलाई एकसाथ संलग्न नेपाल धितोपत्र निस्कासन सातौं संशोधन नियमावली संशोधन गर्न स्वीकृति प्रदान गर्ने निर्णय भएको छ ।

अर्थ मन्त्रालयकै प्रस्तावमा धुलिखेल अस्पताल आपतकालीन केन्द्र तथा सुधार परियोजनाका लागि जापान सरकारबाट प्राप्त हुने ३ अर्ब २० करोड ६० लाख जापानी यन अनुदान सहायता स्वीकृत गर्ने निर्णय पनि मन्त्रिपरिषद बैठकले गरेको मन्त्री शर्माले दिइन् ।