‘डार्ट’ हानेर नियन्त्रणमा लिइयो बुद्धनगरमा आतंक मच्चाएको भैंसी

६ भदौ, काठमाडौं । बुद्धनगरमा बुधबार बिहान आतंक मच्चाएको भैंसीलाई ‘डार्ट’ सुई हानेर नियन्त्रणमा लिइएको छ । शरीरमा  ‘८ नम्बर’ लेखिएको र दाहिने सिङ भाँच्चिएको भैंसी बस्तीमा पसेर आतंक मच्चाएको थियो । भैंसी ज्ञान निकेतन स्कुलभित्र पसेको थियो ।

स्थानीयले खबर गरेपछि डिभिजन वन कार्यालयको प्राविधिक टोली पुगेर बेहोस हुने सुई ‘डार्ट’ प्रहार  गरेर नियन्त्रणमा लिएको हो । र्भैसी कसैले बध गर्न खोज्दा फुत्केर भागेको हुन सक्ने टोलीले अनुमान गरेको छ । 

क्षति हुन नदिन बाक्लो संख्यामा प्रहरी समेत परिचालन गरिएको थियो । भैंसी कहाँबाट कसरी आइपुग्यो भन्ने विषयमा अनुसन्धान भइरहेको प्रहरीले जनाएको छ । भैंसीलाई लैजान गाडी मगाइएको छ ।