राष्ट्रियसभा अध्यक्ष तिमिल्सिना र जापानी संसदीय मैत्री समूहबीच भेटवार्ता

६ भदौ, काठमाडौं । राष्ट्रिय सभाका अध्यक्ष गणेशप्रसाद तिमिल्सिना र नेपाल भ्रमणमा रहेका जापान(नेपाल संसदीय मैत्री टोलीबीच ष्टिाचार भेटवार्ता भएको छ । 

अध्यक्ष तिमिल्सिनासँग जापानको माथिल्लो सदनका सदस्य तथा जापान(नेपाल संसदीय मैत्री समूहका सदस्यहरु कोबयासी काजुहिरो र नागाई मानाबुलगायतको टोलीले बुधबार सिंहदरबारस्थित अध्यक्षको कार्यकक्षमा शिष्टाचार भेट वार्ता गरेको हो । 

भेटका अवसरमा अध्यक्ष तिमिल्सिनाले नेपाल र जापान दुवै देशहरु प्रजातान्त्रिक मूल्य र मान्यतामा समान दृष्टिकोण राख्दै आएको र आगामी दिनमा पनि निरन्तरता दिने बताएका थिए । उनले लोकतन्त्र र प्रजातन्त्रको विकास र सुदृढीकरणमा जापान सरकारले निरन्तर पुर्‍याउँदै आएको सहयोगको लागि धन्यवाद दिए ।

भेटमा जापान नेपाल संसदीय मैत्री समूहका सदस्यहरुले  नेपाल र जापानबीचको द्विपक्षीय सम्बन्धलाई अझ प्रगाढ र सुदृढ बनाउन जापान सरकारले सदैव तयार रहेको बताएका थिए । जापानमा हुने  ‘वर्ल्ड एक्सपो २०२५’ मा नेपालले सहभागिता जनाउने विषय सकारात्मक रहेको बताउँदै उनीहरुले नेपाल–जापान संसदीय मैत्री समूह छिटै गठन हुने अपेक्षा राखेको बताएका थिए ।