प्रगतिशील गायक जेबी टुहुरे  ‘जनगायक’ घोषित

६ भदौ, काठमाडौं । सरकारले चर्चित प्रगतिशील गायक जुठबहादुर खडगी अर्थात जेबी टुहुरेलाई  ‘जनगायक’ को उपाधि दिएको छ । बुधबार बिहान बसेको मन्त्रिपरिषद्‍को बैठकले स्व. गायक टुहुरेलाई ‘जनगायक’को रुपमा सम्मान गर्ने निर्णय भएको सञ्चार तथा सूचना प्रविधिमन्त्री रेखा शर्माले जानकारी दिइन् ।

शर्माका अनुसार संस्कृति पर्यटन तथा नागरिक उड्ययन मन्त्रालयको प्रस्तावमा  टुहुरेलाई उक्त उपाधि दिने निर्णय गरेको हो । हृदयघातबाट टुहुरेको २०७८ भदौ १० मा बाल्खुस्थित बयोधा अस्पतालमा निधन भएको थियो । उनी २००१ साल कात्तिक १५ गते धरानको पुरानो बजारमा जन्मिएका थिए । उनले आफ्नो जीवनकालभरि जनपक्षीय गीत गाएका थिए । 

वरिष्ठ जनगायक जुठबहादुर खड्गी अर्थात जेबी टुहुरेले मृत्यु पनि मान्छेपिच्छे फरक हुँदो रैछ, देशभक्त छोरो मर्दा देशै रुदो रैछ’ गीत जेबी टुहुरेले गाएका थिए । २०२४ यतादेखि मात्र उनले १५० भन्दा बढी जनता गीत गाएको पाइन्छ । उनका गीत मुलुकका परिवर्तन र जनआन्दोलन उठानमा विशेष योगदान पुगेको मानिन्छ । दस वर्षे सशस्त्र संघर्षमा उनले गीत संगीतका माध्यमबाट उल्लेख्य भूमिका योगदान पुर्याएका थिए ।

उनका ‘बसाइँ हिँड्नेको ताँतीले’, ‘आमा दिदी बैनी हो’ जस्ता गीतहरू कालजयी छन् । उनी जीवित छँदै २०७५ मा जेबी टुहुरे फाउण्डेशन समेत स्थापना भएको थियो ।