त्रिशुली अपडेट : उद्धार गरिएका १७ मध्ये १३ जनालाई काठमाडौं ल्याइयो

६ भदौ, काठमाडौं । काठमाडौंबाट पोखरा हुँदै म्याग्दी सदरमुकाम बेनी जाँदै गरेको बस धादिङको गजुरी गाउँपालिका–२ मा दुर्घटना हुँदा ८ जनाको मृत्यु भएको छ । प्रहरीले घटनास्थलबाट १७ जनाको उद्धार गरेको छ । दुर्घटनामा परी मृत्यु भएका तथा घाइते भएकाको परिचय खुल्न बाँकी छ ।
  
दुर्घटना स्थलबाट उद्धार गरिएका १७ जनामध्ये १३ जनाको थप उपचारका लागि काठमाडौं लगिएको जिल्ला प्रहरी कार्यालय धादिङका सूचना अधिकारी डीएसपी सन्तु जयसवालले जानकारी दिए ।  थप चार जना घाइतेको धादिङकै राजमार्ग अस्पतालमा उपचार भइरहेको छ । 

जयसवालका अनुसार मृत्यु हुनेमा दुई महिला र ६ जना पुरुष छन् । दुर्घटनाबारे थप अनुसन्धान भइरहेको छ ।   बुधबार बिहान सवा ११ बजे  प्रदेश ३–०१–००५ ख ९९५२ नम्बरको यात्रु वाहक बस दुर्घटनामा दुर्घटनामा परेको हो । 

बाढी आएको त्रिशुलीमा बस खसेकाले प्रहरीले बसमा सवार यात्रुको घटनाबारे विस्तृत आउन बाँकी रहेको जनाउँदै उद्धार कार्य जारी राखेको जनाएको छ ।