सुन तस्करी छानबिनका लागि आयोग गठन असोज ५ मा

६ भदौ, काठमाडौं । ६० केजी लगायत विभिन्न समयमा भएका सुन तस्करीका घटनाबारे अनुसन्धान गर्न आगामी असजो ५ गते उच्च स्तरीय छानबिन आयोग गठन गरिने भएको छ ।

आज सिंहदरबारमा बसेको राष्ट्रिय मान्यता प्राप्त दलहरुका शीर्षस्थ नेता र शीर्ष तहका नेताहरुको बैठकले यस्तो निर्णय गरेको छ । बैठकबाट दुई बुँदे सहमति कायम भएको छ ।

साउन ३ मा भएको ६० केजी सुन तस्करीको अनुसन्धान सीआईले नै गर्ने र ६० दिनको अनुसन्धान पूरा भएपछि भेपमा राखेर भएका लगायत अन्य सुन तस्करी प्रकरणमाथि छानबिन गर्न असोज ५ मा उच्च स्तरीय छानबिन आयोग गठन गर्ने सहमति भएको नेपाली कांग्रेसका प्रमुख सचेतक रमेश लेखकले बैठकपछि संचारकर्मीहरुलाई बताए ।

छानबिन आयोगले गरेपनि मुद्दा चलाउने काम प्रहरी र सरकारी वकिलबाटै हुने लेखकले बताए । आयोगको क्षेत्राधिकार र समयसीमा सोही बेला तोकिने उनले बताए ।

यो सहमतिसँगै अवरुद्ध दुवै सदन आजदेखि खुल्ने उनले बताए । आयोग गठनको माग गर्दै प्रमुख प्रतिपक्ष नेकपा (एमाले)ले साउन १० गतेदेखि राष्ट्रियसभा र प्रतिनिधिसभाको बैठक निरन्तर अवरुद्ध पार्दै आइरहेको छ ।