स्थायी र स्वतन्त्र पत्रकारको प्रेसप्रतिनिधि प्रमाणपत्रको नवीकरण अवधि बढाइयाे

६ भदौ, काठमाडौं । सूचना तथा प्रसारण विभागले सञ्चार प्रतिष्ठानका स्थायी पत्रकारको प्रेस प्रतिनिधि प्रमाणपत्रको अवधि ३ वर्षको दिने भएको छ । विभागले बुधबार एक सूचना प्रकाशन गरेर यस्तो जानकारी दिएको हो । यसअघि एक वर्षका लागि मात्र दिइँदै आएको थियो । 

हरेक वर्ष नविकरण गर्नूपर्ने व्यवस्थाले विभागमा भीड बढेकाले सेवाग्राहीलाई सहजता प्रदान गर्न यस्तो व्यवस्था गरिएको विभागले जनाएको छ । अस्थायी पत्रकारका लागि साविककै  एक वर्ष नै कायम रहने विभागका प्रवक्ता भरत गाैतमद्वारा जारी सूचनामा उल्लेख छ ।

विभागले एक वर्षभित्र नवीकरण नगरे पुरानो परिचयपत्र नम्बर खारेज गर्ने गरेको भन्दै बारम्बार गुनासो गर्दै आइरहेका बेला विभागले थप सुविधासहित नयाँ व्यवस्था ल्याएको हो ।