नेपाली कामदार लैजान लेबनान इच्छुक, प्रस्ताव तयार पार्दै सरकार

७ भदौ? काठमाडौं । लेबनानले नेपाली कामदार लैजाने भएको छ । त्यसका लागि उसले लेबनानका अवैतनिक महावाणिज्यदूत एलचेख मोहम्मद गोजाएलले श्रम, रोजगार तथा सामाजिक सुरक्षा मन्त्री शरतसिंह भण्डारीसँग भेटेर प्रस्ताव गरेका छन् । 

गोजाएलले आफ्नो मुलुकमा थुप्रै क्षेत्रमा रोजगारीको लागि अवसरहरू रहेको उल्लेख गर्दै नेपाली कामदार लैजान चाहेको बताएका थिए । कामदारको सुरक्षा, स्वास्थ्य तथा पारिश्रमिकलाई लेवनान सरकारले ग्यारेन्टी गर्ने उनले बताए । 

जवाफमा मन्त्री भण्डारीले प्रस्ताव राम्रो भएको र सरकारले छिट्टै निर्णय लिने आश्वसन दिएका थिए । लेवननासँग श्रम समझदारी गरेर श्रमिकहरू पठाउनेबारे निर्णय गरिने मन्त्रालयका सह–सचिव राजीव पोखरेलले बताए । कामदार पठाउने विषयमा सरकारले निर्णय गरेपछि नेपालको तर्फबाट प्रस्ताव पठाउने उनले बताए । लेवनानले निर्माण क्षेत्र, हस्पिटालिटी, कुषि लगायत क्षेत्रमा कामदार लैजाने चाहेको देखिएको उनको भनाइ छ ।

हाल लेबनानमा थुप्रै नेपाली कामदार रहेको वैदेशकि रोजगार विभागको तथ्यांकले देखाएको छ । लेवनानसँग सीमाना जोडिएको इजरायलमा थुप्रै नेपाली कामदार कार्यरत छन् ।