प्रहरी अधिकारीको सरुवाले निष्पक्ष छानविनमा गम्भीर प्रश्न उठाएको कांग्रेस रुपान्तरण अभियानका नेताको ठहर

७ साउन, काठमाडौं । नेपाली कांग्रेस रुपान्तरण अभियानका नेताहरूले नक्कली भुटानी शरणार्थी प्रकरणको अनुसन्धान अघि बढाएका प्रहरी अधिकृतको सरुवा प्रति आपत्ति जनाएका छन् । उनीहरूले प्रहरी अधिकारीको सरुवाले निष्पक्ष छानविनमाथि प्रश्न उठाएको बताएका छन्  ।

भ्रष्टाचार काण्डमा अनुसन्धान गरिरहेका प्रहरी अधिकारीहरूलाई अस्वाभाविक रुपमा सरुवा गरिनुले निष्पक्ष छानबिन माथि नागरिक तहमा गम्भीर प्रश्न उठेको उनीहरूले विज्ञप्ति मार्फत जनाएका छन् । नागरिक तहमा भएको आशंकाबाट राज्य पन्छिन नमिल्ने उनीहरूको धारणा छ ।

नेपाली कांग्रेस रुपान्तरण अभियानका अगुवा नेताहरु मधु आचार्य, डा. गोविन्दराज पोखरेल, गुरुराज घिमिरे, रञ्जित कर्ण, देवराज चालिसे, भुपेन्द्रजङ्ग शाही, भरत बहादुर खड्का र सुवास लोहनीले विज्ञप्ति निकालेर प्रहरी सरुवाप्रति असन्तुष्टि व्यक्त गरेका छन् । नेपाल सुधार नहुनुमा अनियन्त्रित भ्रष्टाचार भएको उनीहरूको निष्कर्ष छ ।