प्राडा अधिकारी सातादेखि सम्पर्कविहीन, शिवपुरीको सीसीटीभी फुटेजमा यस्तो पाइयो

७ भदौ, काठमाडौं । काठमाडौंको बूढानीलकण्ठ नगरपालिका–१ स्थित पञ्चकन्या कोलोनी निवासी प्राध्यापक डा. दलबहादुर अधिकारी एक सातादेखि सम्पर्कविहीन भएका छन् ।

अधिकारी साउन ३२ गते बिहान ११ बजे मुहानपोखरीतर्फ निस्किएका उनी अहिलेसम्म सम्पर्कमा नआएको परिवारले जनाएको छ । उनी हराएको विषय प्रहरीमा समेत जानकारी गराइएको छ । प्रहरीले पनि फेला पार्न नसकेको अधिकारीकी छोरी बन्दनाले बताइन् । हराएकाबारे सामाजिक संजालमा समेत सूचना राखिएको उनले बताइन् । सीसीटीभी फुटेजमा त्यस दिन उनी साढे १२ बजे शिवपुरी जाने बाटोमा देखिएको बताइएको छ ।

अधिकारीले हल्का सेतो सर्ट, खरानी रङको सुरुवाल र कालो मोजा लगाएको बताइएको छ । अधिकारी त्रिभुवन विश्वविद्यालयका सेवानिवृत्त प्राध्यापक हुन् । बुबालाई अल्जाइमर (बिर्सने ‍रोग) भएको र देख्ने, भेट्नेले खबर गरिदिन समेत भनेकी छन् ।