चिठ्ठामा आईफोन परेको भन्दै लाखाैं ठगी गरेको आरोपमा २ युवक पक्राउ

७ भदौ, काठमाडौं । चिठ्ठामा आईफोन पर्‍यो भन्दै लाखौं रूपैयाँ ठगी गरेको आरोपमा प्रहरीले २ युवकलाई काठमाडाैंबाट पक्राउ गरेको छ ।

पक्राउ पर्नेमा पर्साको बहुदरमाई नगरपालिका–८ का ३० वर्षीय राजकुमार पण्डित र रौतहटको कटहरीया नगरपालिका–१ का २१ वर्षीय उमेशकुमार यादव रहेको प्रहरीले जनाएको छ । उनीहरुलाई साइबर ब्यूरोबाट खटिएको प्रहरीले बुधबार काठमाडौंका विभिन्न स्थानबाट पक्राउ गरेको थियो । 

उनीहरुले चिठ्ठामा आईफोन पर्‍यो भन्दै बुझ्नका लागि भन्सार तिर्न बैंकमा रकम जम्मा गर्न लगाएर सम्पर्कविहीन भएपछि पीडितहरु प्रहरीमा पुगेर उजुरी दिएका थिए । दुई जनाले विभिन्न व्यक्तिबाट ७० लाख रुपैयाँ भन्दा बढी ठगी गरेको खुलेको प्रहरीको दाबी छ । उनीहरुको साथबाट १८५ थान सिमकार्ड, बैंक एटीएम कार्ड र ५० लाख रुपैयाँ रकम बरामद भएको जनाइएको छ । 

अभियुक्त दुवै जनालाई जिल्ला अदालत काठमाडौंबाट ७ दिनको म्याद लिई साइबर अपराध र ठगी कसुरमा आवश्यक अनुसन्धान भइरहेको छ ।