महासंघका प्रतिनिधिले राष्ट्रपतिलाई गराए देशको आर्थिक अवस्थाबारे जानकारी

७ भदौ, काठमाडौं । नेपाल उद्योग बाणिज्य महासंघका अध्यक्ष चन्दप्रसाद्र ढकालसहितका प्रतिनिधिले राष्ट्रपति रामचन्द्र पौडेललाई देशको पछिल्लो आर्थिक अवस्थाबारे जानकारी गराएका छन् । उनीहरुले बिहीबार राष्ट्रपति कार्यालय शीतलनिवास पुगेर देशको अर्थतन्त्र र निजी क्षेत्रको अवस्थाबारे जानकारी गराएका हुन् । 
 
भेटमा नेपाल उद्योग वाणिज्य महासंघका अध्यक्ष चन्द्रप्रसाद ढकालले मुलुकको अर्थतन्त्रका केही सुचकहरू सकारात्मक रहेपनि आमनागरिक र व्यवसायीहरूको आत्मविश्वास बढाएर अर्थतन्त्रलाई चलायमान बनाउने तर्फ सरोकारवालाले ध्यान नगएको बताएका थिए । उनले स्वदेशी तथा विदेशी लगानी आकर्षित गरी घरेलु उत्पादनमा जोड दिँदै आयात घटाएर निर्यात बढाउने तर्फ सबै लाग्नुपर्ने अवस्थामा सरकार एक्लै हिड्न चाहेको बताएका थिए ।  

ढकालले अर्थतन्त्रमा देखिएको समस्याले अहिले आर्थिक गतिविधिलाई सुस्त बताउँदै रोजगारी सिर्जना हुन नसक्नु, विप्रेषणमा निर्भरता बढ्दै जानु, निर्यात घट्दै जानु, नीतिगत सुधार र सामन्जस्यता नहुँदा आन्तरिक तथा विदेशी लगानी बढ्न नसक्नु, सेवा प्रवाहमा बेला बेलामा विध्न बाधा देखा पर्ने गरेको जानकारी गराएका थिए । मूल्य वृद्धिलगायत साना र मझौला उद्योगहरू समस्याग्रस्त हुँदै जाने यो अवस्थामा निजी सार्वजानिक साझेदारी बाञ्छनीय भएपनि सरकारले यसतर्फ ध्यान नदिएको बताए । 

अध्यक्ष ढकालले प्रतिनिधिका तर्फकबाट कुरा राखेपछि जवाफमा राष्ट्रपति पौडेलले अर्थतन्त्रमा निजी क्षेत्रको सहभागिता उत्साहजनकरूपमा भएमात्र देशको आर्थिक विकास सम्भव हुने बताए । पौडेलले निजी क्षेत्रको उत्साहजनक सहभागिताले मात्रै देशको आर्थिक समुन्नति सम्भव हुने बताए ।

सरकार र निजी क्षेत्रबीच पारस्परिक सहअस्तित्व र समभावको दरिलो साझेदारी आवश्यक छ भन्दै पौडेलले नेपालको अर्थव्यवस्थामा नीजि क्षेत्रको ८० प्रतिशतभन्दा बढी हिस्सा रहेको र मुलुकको आर्थिक समुन्नतिमा निजी क्षेत्रको भूमिका अर्थपूर्ण रहने बताए । 

राष्ट्रपति पौडेलले नेपालमा रोजगारी सृजना गर्न र देशको अर्थतन्त्र सुधार्न सबैको ध्यान जानुपर्नेमा जोड दिँदै केही दिन अगाडि आफूले बोलाएको सर्वदलीय बैठकमा समेत अर्थतन्त्र सुधारका लागि सवैको ध्यानाकर्षण गराएको बताए ।