छानबिन समितिले सुरु गर्यो आरती साह मृत्यु प्रकरणकाे छानबिन

८ भदौ , काठमाडौं । आरती साह मृत्यु प्रकरणको छानबिन गर्नका लागि नेपाल प्रहरीले गठन गरेको विशेष छानबिन टोली घटनास्थल जनकपुरधाममा पुगेको छ । नेपाल प्रहरीका प्रहरी नायव महानिरीक्षक (डीआईजी) विकास खनालको नेतृत्वमा बनेकाे छानबिन समिति बिहीबार जनकपुरधाम उपमहानरपालिका–९ थापाचोक पुगेको हो । 

गएको जेठ ७ गते आरतीलाई उनकै घरमा झुण्डिएको अवस्थामा मृत फेला परेकी थिइन् । उनका माइती पक्षले आरतीलाई दाइजो नल्याएको निहुँमा सासु, ससुरा, देवार मिलेर हत्या गरी आत्महत्याको दोष लगाएको भन्दै प्रहरीमा उजुरी दिएका थिए । उजुरी दर्ता र अनुसन्धान गर्न प्रहरीले नमानेपछि आरतीका बहिनी, बाबु र आमा लगायत ६८ दिनदेखि काठमाडौंको माइतीघर मण्डलामा धर्ना बसिरहेका छन् । 

यस्तो अवस्थाबीच संसदको दुवै सदनमा सांसदहरुले आरतीको हत्यारा पत्ता लगाएर कारवाहीको दायरामा ल्याउन बारम्बार आवाज उठाएपछि प्रहरीले समिति गठन गरेर अनुसन्धान सुरु गरेको हो । 

टोलीले अनुन्धान सुरु गरेको छ । समितिका सदस्य वरिष्ठ प्रहरी उपरीक्षक (एसएसपी) शेखर खनाल सहितको टिमले घटना स्थल, मृतकका माईती तथा ससुराली पक्षका आफन्तहरू, छिमेकीहरूसँग, ईन्सेक र आरेक नेपाल, अभियानी तथा अन्य निकायका पदाधिकारीहरूसँग जानकारी लिएको छ । प्रहरीले यसअघि नै दुई जनालाई नियन्त्रण लिएर अनुसन्धान गरिरहेको छ ।