व्यवसायीको गुनासो सुनेपछि राष्ट्रपतिले बोलाए गभर्नर

८ भदौ, काठमाडौं । राष्ट्रपति रामचन्द्र पौडेल र नेपाल राष्ट्र बैंकका गभर्नर महाप्रसाद अधिकारीबिच भेटवर्ता भएको छ । शुक्रबार शीतल निवासमा गभर्नर अधिकारीलाई बोलाएर देशको अर्थतन्त्रबारे जानकारी लिएका छन् । गभर्नर अधिकारीले राष्ट्रपतिलाई देशको वर्तमान आर्थिक अवस्थाबारे जानकारी गराएका थिए । राष्ट्रपति पौडेलले देशको अर्थतन्त्रसँगै नेपाल राष्ट्र बैंकको कार्यबारे अधिकारीसँग चासो राखेका थिए ।

बिहीबार व्यवसायीहरुसँग छलफल गरेपछि राष्ट्रपति पौडेलले आज राष्ट्र बैंकका गभर्नर अधिकारीलाई बोलाएर अर्थतन्त्रको सुधारको लागि निजी क्षेत्रले राखेका जिज्ञासामा छलफल गरेको बताइएको छ । बिहीबार नेपाल उद्योग वाणिज्य महासंघका अध्यक्ष एवं कार्यसमिति सदस्यहरुले विद्यमान आर्थिक अवस्थाका सुधारका लागि सरकार र निजीबीच सहकार्य आवश्यक रहेको राष्ट्रपति पौडेललाई जानकारी गराएका थिए । 

सरकार र निजी क्षेत्रबीच पारस्परिक सहअस्तित्व र समभावको दरिलो साझेदारी भएमात्र नेपालको अर्थव्यवस्थामा ८० प्रतिशतभन्दा बढी हिस्सा रहेको निजी क्षेत्रले काम गर्न सक्ने उनीहरुके माग थियो । विप्रेषणमा निर्भरता बढ्दै जानु, निर्यात घट्दै जानु, नीतिगत सुधार र सामन्जस्यता नहुँदा आन्तरिक तथा विदेशी लगानी बढ्न नसक्नु, सेवा प्रवाहमा बेला–बेलामा अबरोध देखा पर्ने गरेका विषयमा छलफलभएको थियो ।  

निजी क्षेत्र र सर्वसाधारणको मनोबल घटेका अहिलेको अवस्थामा बजारमा माग सिर्जना गर्न सरकार, केन्द्रीय बैंक र निजी क्षेत्रले एक आपसमा सहकार्य गर्नुपर्ने विषयमा छलफल गर्न राष्ट्रपतिले गर्भनर अधिकारीलाई बोलाका हुन् । गभर्नरले पुँजीगत खर्च, बैंक वित्तीय संस्थाहरुबाट पनि कर्जा प्रवाह हुन नसकेको अवस्थामा बजारमा मागको कमी आएको जस्ता विषयको जानकारी गराएका थिए ।