हुम्लाको रिपगाड खोलामा बेपत्ता दाजुभाईमध्ये भाईको जीवितै उद्दार

८ भदौ, काठमाडौं । हुम्लाको रिपगाड खोलामा आएको बाढीमा बेपत्ता भएका दाजुभाई मध्ये भाईको उद्धार गरिएको छ । बुधबारदेखि परिरहेको भारी वर्षापछि जिल्लाका विभन्नि खोलामा बाढी आएको छ । 

बिहीबार बेलुका सर्केगाड गाउँपालिका–२ स्थित रिपगाड खोलामा आएको बाढीले सिमकोटबाट घर फर्किदै गरेका ताँजकोट गाउँपालिकाका मनऋषी र उनका भाइ धर्मदत्त जैशीलाई बगाएको थियो ।

सो क्रममा स्थानीयले देखेपछि ४० वर्षीय भाई मर्धदत्तलाई मात्र उद्धार गर्न सकेका थिए । ५० वर्षीय दाई मनऋषी बेपत्ता रहेको स्थानीय विजय फडेराले बताए । रिपगाड खोलामा आएको बाढीले झोलुङ्गे पुल र काठको साँघु समेत बगाएको छ ।

बाढीको बहाब नघटेका कारण बेपत्ताको खोजीमा विलम्ब भएको रिपस्थित प्रहरी चौकीले जनाएको छ । 
रिपगाड खोलमा दुईवटा घट्ट र घट्टमा पिस्न राखिएका ३० बोरा अन्न समेत बगाएको छ । रिपागाड खोलामा आएको बाढीले हुम्ला कर्णालीको पानी थुनिएको बताइएको छ । थुनिएपछि रिपगाड खोला आसपासको जमिनमा ताल बनेको स्थानीयको भनाइ छ ।