मुलुकलाई समाजवादमा पुर्याउन समाजवादी मोर्चाले सशक्त भूमिका खेल्छ : प्रधानमन्त्री प्रचण्ड

८ भदौ, काठमाडौं । प्रधानमन्त्री एवं माओवादी केन्द्रका अध्यक्ष पुष्पकमल दाहाल ‘प्रचण्ड’ले समाजवादी मोर्चा गठन मुलुकलाई समाजवादमा पुर्याउने उद्देश्यले भएको बताएका छन् । 

मोर्चाको पूर्वघोषित कार्यक्रम अनुसार मधेश प्रदेशको वीरगन्जमा आज ओयोजित सन्देशसभामा बोल्दै प्रधानमन्त्री प्रचण्डले मुलुकलाई सुशासन र समृद्ध बनाउन समाजवादको दिशा लैजानुको विकल्प नरहेको बताए । उनले मोर्चा गठनमा मधेशका नागरिकको विशिष्ठ र रणनीतिक भूमिका रहेको बताए । 

चार दल आवद्ध मोर्चाले मधेशमा जरो गाडेर बसेका मिटरब्याजी संस्कारलाई भत्काउन महत्वूपूर्ण भूमिका खेलिरहेको बताउँदै सभ्य समाज निर्माणको रणनीतिमा अगाडि बढिरहेको बताए । मधेशका असल नागरिकको साथ पाएकै कारण सरकारले मिटरब्याजीलाई ठेगान लगाउन सकेको बताए । 

उनले जनयुद्ध र मधेश आन्दोलनलाई बदनाम गराउने काम सामाजिक संजालबाट भइरहेको भन्दै त्यसको प्रतिवाद सरकारले राम्रो काम गरेर गर्ने बताए ।

उनले आफू राम्रो काम मात्र गरेर मर्ने सपना बोकेको बताउँदै उनले सरकारले गरेका राम्रा कामको खुलेर प्रचार र समर्थन आग्रह गरे । ‘मलाई अब राम्रोबाहेक अन्य गर्नु छैन । जीवनको उत्तरार्द्धमा राम्रो काम गरेर नेपाली जनताले सम्झनेलायक काम गर्ने विचार छ । ढुक्कसँग मर्ने रहर छ’ उनले भने ।