वाग्मतीमा महाजलयात्रा गरेर नदी महोत्सव

९ भदौ, काठमाडौं । बागमती नदी संरक्षण अभियानलाई प्रभावकारी बनाउन जलयात्रा गरेर नदी महोत्सव गरिएको छ । नेपाल एशोसिएसन अफ र्याफ्टिङ एजेन्सीज् (नारा), नेपाल नदी संरक्षण संस्था र फ्रेन्डस क्लब कुपण्डोलको आयोजनामा आज ‘नदी महोत्सव तथा महाजलयात्रा’ गरिएको हो । महोत्सव बाजागाजासहित सुरु गरिएको थियो ।

नाराका उपाध्यक्ष शिशिर खनालले बागमती नदी सभ्यताको पहिचान, संरक्षण र सम्वर्द्धनका साथै र्याफ्टिङ र जल पर्यटनको उजागर गर्नका लागि र नदी महोत्सव तथा महाजलयात्रा गरिएको जानकारी दिए। ललितपुरको कुपण्डोलस्थित वाग्मती पुलबाट बिहान ७ः०० बजेदेखि महाजलयात्रामा १५ वटा डुङ्गामार्फत जलयात्रा गरिएको उपाध्यक्ष खनालले बताए । काठमाडौँ सहरका साथै वाग्मती नदीको वातावरण दूषित भएको भन्दै महोत्सव आयोजना गर्न गरिएको उनको भनाइ छ ।

उपत्यकाबासीमा नदी सरसफाइबारे जागरण गराउने लगायत उद्देश्यका साथ नेपाल र्याफ्टिङ एजेन्सिज (नारा),नेपाल नदी संरक्षण संस्था र फ्रेन्ड्स क्लब कुपन्डोलको आयोजनामा शनिबार थापाथलीदेखि सुन्दरीघाटसम्म जलयात्रा आयोजना गरिएको हो । नाराका अध्यक्ष शिव अधिकारीका अनुसार प्राकृतिक सुन्दरता कायम राख्न र संरक्षणबारे उपत्यकाबासीलाई चेतना जगाउने उद्देश्य राखेर भएको यो २२ औं जलयात्रा हो ।

ललितपुरको कुपन्डोलस्थित वाग्मती पुलबाट सुरु भएको जलयात्रामा १७ वटा बोट सहभागी थिए । जलयात्रामा ललितपुर महानगरपालिकाका मेयर चिरि बाबु महर्जन, वातावरणविदलगायत विशिष्ट व्यक्तिहरू सहभागी थिए । सामाजिक सभ्यता र धार्मिक पक्षसँग जोडिएको वाग्मती नदीमा प्रदूषण गर्ने क्रम वृद्धि भएसँगै नाराले सन् २००१ देखि हरेक वर्ष मनसुनीयाममा जलयात्रा महोत्सव गर्दै आएको छ ।