आर्थिक गतिविधि बढाउन ७७ वटै जिल्लामा सार्वजनिक निजी साझेदारी आयोजना संचालन गरौँ : अध्यक्ष ढकाल

९ भदौ, काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले मुलुकका ७७ वटै जिल्लामा कम्तीमा एउटा वृहत् व्यावसायिक आयोजना संचालन गर्नुपर्ने बताएका छन्।

जिल्ला समन्वय समितिद्वारा आयोजना गरिएको समन्वय तथा अनुगमन राष्ट्रिय सम्मेलनलाई शनिबार काठमाडौंमा सम्बोधन गर्दै अध्यक्ष ढकालले हरेक जिल्लामा आर्थिक गतिविधि बढाउन र तहाँ उपलब्ध स्रोत साधनलाई सदुपयोग गर्न  सार्वजनिक निजी साझेदारीमा कम्तिमा एउटा वृहत् व्यावसायिक आयोजना संचालन गर्नका लागि केन्द्र, प्रदेश र स्थानीय सरकारले पहल गर्नुपर्ने बताएका हुन् ।

यसबाट जिल्लामा उपलब्ध स्रोत साधनलाई सदुपयोग गर्दै जिल्लामा आर्थिक गतिविधि बढाउन सकिने र स्थानीय रूपमा राजश्व संकलन तथा रोजगारी सृजना हुन सक्ने भन्दै महासंघ र जिल्ला उद्योग वाणिज्य संघहरू सरकारसँग सहकार्य गर्न तत्पर रहेको उनको भनाइ छ। उनले सरकार तथा निजी क्षेत्रसँग समन्वय कारी भूमिका निर्वाह गर्न जिल्ला समन्वय समितिका पदाधिकारीहरूलाई आग्रह समेत गरे।