सरकारी वकिलको कार्यालयले सीआईबीले बुझाएको प्रतिवेदनको अभियोगपत्र आज अदालतमा बुझाउँदै

१० भदौ, काठमाडौ । जिल्ला सरकारी वकिलको कार्यालयले आज ललितानिवास जग्गा अनियमितता प्रकरणमा सीआईबीले बुझाएको अनुसन्धान प्रतिवेदनका आधारमा अभियोगपत्र दर्ता गर्ने भएको छ । 

शनिबार अबेर सरकारी वकिलको टोलीले प्रतिवेदनको अभियोगपत्रको मस्यौदा तयार पारेको छ । जिल्ला सरकारी वकिलको कार्यालयले मुद्दा लैजान ढिलाइ हुँदा मुद्दाका पक्षहरुबाट अस्वभाविक चासो र दवाव आउने भएकाले अदालत खुल्नासाथ अभियोगपत्र दर्ता गर्ने तयारी गरेको हो ।

सीआईबीले बालुवाटारस्थित ललिता निवास परिसरको सरकारी जग्गा हिनामिना प्रकरणमा रायसहितको अनुसन्धान प्रतिवेदन मंगलबार जिल्ला सरकारी वकिलको कार्यालयलाई बुझाएको थियो । जग्गा हिनामिना प्रकरणमा सीआईबीले पूर्वउपप्रधानमन्त्री एवं कांग्रेस नेता विजयकुमार गच्छदारसहित साढे २ सय जनालाई प्रतिवादी बनाएर मुद्दा चलाउन राय दिएको छ । 

गच्छदारसहित पूर्वमन्त्रीहरू चन्द्रदेव जोशी, डम्बरबहादुर श्रेष्ठ, पूर्वराज्यमन्त्री सञ्जय साह, पूर्वसचिवहरू दीप बस्न्यात, छविराज पन्त, दिनेशहरि अधिकारी, नारायणगोपाल मलेगो, युवराज भुसालसहित सहसचिव, उपसचिव शाखा अधिकृत, सुब्बा र खरिदारसम्मका व्यक्तिलाई प्रतिवादी बनाउन राय दिइएको छ ।