ललितानिवास जग्गा हिनामिनाका अभियुक्तविरुद्ध संगठित अपराधमा मुद्दा नचलाइने

१० भदौ, काठमाडौं । ललितानिवास जग्गा अनियमितता प्रकरणका अभियुक्तहरु विरुद्ध संगठित अपराधको आरोपमा मुद्दा नचलाउने भएको छ । अदालतमा मुद्दा अभियोजनको जिम्मा पाएको जिल्ला सरकारी वकिलको कार्यालय काठमाडौंले यस्तो निर्णय गरेको हो । 

विद्यमान कानुन जारी हुनुभन्दा पहिल्यै ललितानिवास जग्गा अनियमितता भएको निष्कर्षसहित संगठित अपराधबाहेक कीर्तेको अभियोगमा मात्रै मुद्दा अभियोजन दर्ता गराउने भएको हो ।

नेपाल प्रहरीको केन्द्रीय अनुसन्धान ब्यूरो (सीआईबी)ले वकिलको कार्यालयमा गत बुधबार बुझाएको प्रतिवेदनमा भने संगिठत रुपमा जग्गा हिनामिना गरेको निकर्षसहित संगिठत अपराध कसुरमा पनि मुद्दा चलाउनुपर्ने राय दिएको थियो । उसले सोही कसुरमा ५५ दिनसम्म अनुसन्धान गरेर प्रतिवेदन (मिसिल) बुझाएको थियो । संगठित अपराध कसुरमा अभियुक्तलाइ ६० दिनसम्म हिरासतमा राखेर अनुसन्धान गर्न पाइने कानूनी व्यवस्था छ । 

प्रकरणमा सरकार तत्कालीन मन्त्री, सचिव सहसचिव, नापी र मालपोतका कर्मचारी, जग्गा खरिदकर्ता लगायत गरी २८६ जना विरुद्ध मुद्दा चलाउन राय दिइएको छ । जसमध्ये २३ जना पक्राउ परेका छन् भने बाँकीलाई फरार सूचीमा राखिएको छ ।

प्रकरण २०६६ र २०६९ मा तत्कालीन सरकारका मन्त्रिपरिषदकाे निर्णयबाट बालुवाटारकाे ललितानिवासकाे १४३ राेपनी जग्गा गुठी हुँदै विभिन्न व्यक्तिकाे नाममा गएकाे थियाे । जग्गा खरिद गर्नेमध्ये केहीले जग्गा फिर्ता समेत गरिसकेकाे अवस्था छ ।