ललितानिवास प्रकरणः प्रतिवेदनमा नसमेटिएका सचिव राउतविरुद्ध पनि मुद्दा चलाउने निर्णय

१० भदौ, काठमाडौं । जिल्ला सरकारी वकिलको कार्यालय, काठमाडौंले सरकारी स्वामित्वको ललितानिवासको १४३ रोपनी जग्गा हिनामिना कसुरमा सरकारका वहालवाला सचिव कृष्णबहादुर राउतविरुद्ध पनि मुद्दा चलाउने निर्णय गरेको छ । 

प्रहरीको केन्द्रीय अनुसन्धान ब्यूरो (सीआईबी)ले अनुसन्धान सकेर गत बुधबार वकिलको कार्यालयमा प्रतिवेदन बुझाउँदा राउत र वैद्यलाई मुद्दा नचलाउन राय दिएको थियो । राउतलाले २०६७ असारमा भौतिक पूर्वाधार भूमिसुधार मन्त्रालयको शाखा अधिकृत छँदा सरकारी जग्गालाई व्यक्तिको नाममा लैजान टिप्पणी सदर गरेको अभियोग लागेको छ ।

सोही अभियोगमा राउनलाई साउनमा त्रिभुवन आन्तरिक विमानस्थलबाट पक्राउ सीआईले पक्राउ गरेको थियो । तर जिल्ला अदालत काठमाडौंको आदेशमा उनलाई थुनाबाहिर राखेर अनुसन्धान गर्न आदेश दिएको थियो । त्यसपछि उनी थुनबाहिरै रहेर तारेख खेपिरहेका थिए ।

प्रकरणमा सरकारी लिखित कीर्ते र संगिठत अपराध गरेको कसुरमा मुद्दा चलाउन सीआईबीले ६० दिनको अनुसन्धान सकेर वकिलको कार्यालयमा गत बुधबार प्रतिवेदन बु्झाएको थियो । त्यसमा राउतलाई उन्मुक्ति दिइएको थियो । तर कार्यालयले भने राउतलाई कीर्ते कसुरमा मुद्दा चलाउने निर्णय गरेको हो । राउत अहिले संचार सचिव छन् ।

योसँगै प्रकरणमा प्रतिवादीको संख्या २९० पुगेको छ । वकिलको कार्यालयले राउतहसित ४ जना थपेर २९० जनालाई प्रतिवादी बनाएको हो । प्रतिवादी सबैजना विरूद्ध सरकारी कीर्ते कसुरमा मात्र मुद्दा चलाइएकाे छ । मुद्दा चल्नेमा राउत र गृहका सहसचिव सुशिल वैद्य बहालवाला कर्मचारीका उपल्लाे तहका रहेका छन् ।