संघीयता बलियो भएमात्र सुशासन आउँछ : नेता निधि

१० भदौ, काठमाडौं । नपाली कांग्रेसका नेता एवं पूर्वउपप्रधानमन्त्री विमलेन्द्र निधिले संविधानको संघीयता बलियो भए मात्र मुलुकमा सुशासन कायम हुन सक्ने बताएका छन् । उनले संघीयतालाई बलियो बनाउन कतैबाट संकीर्णता देखाउन नहुने बताए । 

आईतबार जनकपुरधाममा महावीर युवा कमिटीका नव निर्वाचित पदाधिकारीहरूको पद हस्तान्तरण तथा शपथ ग्रहण कार्यक्रममा नेता निधिले विगतका आन्दोलनमा अभिव्यक्त भएका जनचाहना पूरा गर्न स्थानीय तहलाई मजबुत बनाउन जरुरी रहेको बताए । 

उनले कांग्रेस र मधेश एक अर्काको पूरक भएको भन्दै मधेशमा काँग्रेस बलियो भयो भने मधेश बलियो हुने भएकाले कांग्रेसलाई बलियो बनाउन युवाहरू अगाडि बढ्नुपर्ने बताए । उनले जनकपुरधामको विकासका लागि आवश्यक पर्ने सडक, रेल तथा हवाई सेवाको विकास र विस्तारका लागि आफू निरन्तर लागिरहेको र यसमा सरकार सकारात्मक रहेको बताए । 

स्थानीय विकासका पूर्वाधार निर्माण युवा शक्ति अग्रसर हुनुपर्ने बताउँदै हरेक राजनीतिक मिलेर अगाडि बढ्नुको विकल्प नरहेको उनको भनाइ थियो । कार्यक्रममा जनकपुरधाम उपमहानगरपालिकाका प्रमुख मनोजकुमार साहले स्थानीय विकासको माध्यमबाट मुलुकमा सुशासन र विकासमा सक्दो सहयोग पुरयाउने ढंगबाट काम भइरहेको धारण राखे ।