संसदीय सुनुवाइ विशेष समितिकाे सभापति राप्रपालाई दिन कांग्रेस सहमत

१० भदौ, काठमाडौं । सत्ता गठबन्धनले संसदीय सुनुवाइ समितिको सभापति राप्रपालाई दिने निर्णय गरेको छ । संसदीय समितिको सभापति राप्रपालाई दिने सहमति भएको राप्रपाका नेता तथा प्रतिनिधिसभा सदस्य बुद्धिमान तामाङले बताए । 

समिति सभापति राप्रपालाइ दिन कांग्रेस तयार भएपछि राप्रपाले सभापतिमा उम्मेदवारी दिने तयारी गरेकाे छ । 

उक्त समितिमा राप्रपाले सांसद पशुपति शमशेर राणालाई पठाउने तयारी गरेको छ । समितिमा राप्रपाबाट राणाको एकल उपस्थिति रहेको छ । उक्त समिति कांग्रेसको भागमा परेको थियो । जसका सभापतिका लागि सहमहामन्त्री जीवन परियारको उम्मेदारी टुंग्याइएको थियो ।

सत्तारुढ र प्रमुख विपक्षी एमालेबीचको भागबण्डामा प्रतिनिधिसभा तर्फका १० मध्ये कांग्रेस ४,  एमाले ३, माओवादी केन्द्र २, जसपा, जनमत एकएक सभापति लिने सहमति भएको थियो ।

कांग्रेसकाे लचकतालाइ काेशी प्रदेशमा कांग्रेसकाे नेतृत्वमा राप्रपासहितकाे सरकार बनाउने तयारीकाे रूपमा हेरिएकाे छ । एक मतकाे अभावमा कांग्रेसका उद्वव थापा नेतृत्वकाे वर्तमान काेशी सरकार अप्ठ्याराेमा परिरहेकाे छ ।