‘एमसीसी सम्झौता कार्यान्वयन नरोकिए नेपाल अमेरिकी सेनाको क्रिडास्थल बन्छ' : विप्लव

१० भदौ, काठमाडौं । विप्लव नेतृत्वको नेपाल कम्युनिस्ट पार्टी (नेकपा)ले आज देशभर एमसीसी सम्झौता कार्यान्वयनको विरोधमा प्रदर्शन गरेको छ । काठमाडौंमा नेकपा उपत्यका ब्यूरो र जवस मोर्चाद्वारा आज आयोजित विरोध कार्यक्रममा पार्टीकी स्थायी समिति सदस्य उमा भुजेलले एमसीसी सम्झौता राष्ट्रघाती सम्झौता भएको र यसलाई स्वाधीन नेपाली कुनै हालतमा स्वीकार्न नसकिने बताइन् । 

नेकपाका कार्यकर्ताहरूले एमसीसी सम्झौता कार्यान्वयन कार्यालय घेराउ गरेका थिए । नेतृ भुजेलले अमेरिकाले नेपाललाई राजनीति र फौजी क्रिडास्थल बनाउने उद्देश्यले विकासका सानातिना कार्यक्रम जबर्जस्ती लागु गर्न खोजेको बताइन् । प्रदर्शनकारीहरूले ‘गाे ब्याक अमेरिका’ लगाएका छन् ।

नेकपाले भोलि काठमाडौंमा सम्झौता कार्यान्वयन रोक्ने सम्बन्धी विशेष अन्तरक्रिया कार्यक्रम गर्दैछ । पर्सि नुवाकोटमा गर्दैछ । नेकपा पहिलो चरणको कार्यसहित यही भदौ ५ गतेदेखि संघर्षमा रहेको छ । सम्झौता कुनै पनि हालत कार्यान्वयन हुन नदिने र सरकारले गरेको व्याख्यात्मक टिप्पणी सम्बोधन हुनुपर्ने बताउँदै आएको छ । 

टिप्पणीमा नेपालको हित हुने गरेर मात्र सम्झौता लागू गर्ने उल्लेख छ । तर एमसीसीको नेपाल कार्यालयले यही भदौ १३ गतेदेखि सम्झौता पूर्ण रुपमा कार्यान्वयनमा जाने बताइसकेको छ । सोही क्रममा एमसीसीका जिम्मेवार अधिकारीहरू चाँडै काठमाडौंमा आउने भएका छन् । एमसीसी अमेरिकाको विदेशमन्त्रीको नेतृत्वमा स्थापित संस्था हो । जुन उसको सैन्य संरचना इन्डो प्यासिफिकको अंग हो ।