ड्रुक एयरले भुटानको पारोबाट पोखरामा व्यवसायिक उडान गर्ने

११ भदौ, काठमाडौं । भुटानको सरकारी ऐयरलाइन्स ड्रुक एयरले भुटानको पारो अन्तर्राष्ट्रिय विमानस्थलबाट पोखरा अन्तर्राष्ट्रिय विमानस्थलमा सिधा व्यवसायिक उडान गर्ने भएको छ ।

ड्रुकले ९ सेप्टेम्बर अर्थात २३ भदौबाट पारोबाट न्यारोबडीमा पोखरा चार्टर्ड  उडान गर्न अनुमति पाइसकेको जनाएको छ । उक्त जहाज पोखराबाटै पारो उडान भर्नेछ । 

ड्रुकले भुटानबाट नियमित उडान गर्ने आश्वासन दिएको नेपाल नागरिक उड्डयन प्राधिकरणका सूचना अधिकारी ज्ञानेन्द्र भुलले जानकारी दिएका छन् । 

अंग्रेजी नयाँ वर्षको दिन पारेर गत १ जनवरी २०२३ का दिन उद्घाटन भएको यो विमानस्थलमा अहिलेसम्म अन्तर्राष्ट्रिय व्यवसायिक एउटा हुन सकेको छैन । चीनबाट केही महिना पहिले एक चार्टर्ड उडान मात्र भएको थियाे ।