जीवनमा असफल भएका पात्रहरू सम्मिलित समाजवादी मोर्चाको औचित्य छैन : प्रभु साह

११ भदौ, काठमाडौं । आम जनता पार्टी (आजपा)का अध्यक्ष प्रभु साहले समाजवादी मोर्चामा आफ्नो जीवनमा असफल भएका व्यक्तिहरु मिलेर बनाएका कारण औचित्य नगरेको बताएका छन् । 

सरकारमा सहभागी रहेका माओवादी केन्द्र, जसपा एकीकृत समाजवादी र संसदीय धारबाट बाहिर रहेका नेकपा मिलेर केही हप्ता पहिले मात्र समाजवादी मोर्चा गठन भएको थियो । उक्त मोर्चाले नेपाली विशेषतासहितको समाजवादी व्यवस्था गर्ने बताउँदै आइरहेको बेला पूर्वमन्त्री समेत रहेका अध्यक्ष साहले जीवनमा राजनीतिकमा असफल भएका र ढाँटछल, तिकडम र अपराध गर्नेहरु नै सहभागी रहेको बताए । 

साहले सोमबार काठमाडौंमा शुरु भएको पार्टीको केन्द्रीय समितिको बैठकमा बोल्दै नयाँ नाम दिएर लुट्ने कामलाई निरन्तरता दिन मोर्चा गठन भएको बताए । उनले वर्तमान संविधान लुट्ने, ठग्ने र विदेश भाग्नेहरुलाई संरक्षण दिने किसिमका रहेको बताए । संविधान श्रमिक वर्ग र गरिबमाथि मजाक गर्ने किसिमका रहेको र यसलाई परिवर्तन गर्नुको विकल्प नरहेको बताए । 

यस्तै उनले मुलुकमा दुई थरि वर्ग रहेको र यसलाई हटाउन नसक्दासम्म मुलुकबाट गरिबी नहट्ने र श्रमिकको सम्मान नहुने बताए । उनले एकथरि जनता देशभित्र र देशबाहिर रहेर पनि श्रम, पसिना गरेर देशलाई बचाउन र समृद्ध बनाउन लागिरहेको र अर्काथरि देशभित्रै रहेर राज्यको नीति बनाएर ढुकुटी कुम्ल्याउने, गलत र अपराधिक धन्दा चलाएर चलअचल सम्पत्ति लिएर विदेश भाग्नेहरु रहेको बताए । 

नेपालभित्रबाट चलअचल सम्पत्ति बोकेर विदेश भाग्नेहरुलाई ठेगान लगाउने कानून जरुरी रहेको बताउँदै त्यसनिम्ति आजपाले जनसंघर्ष गर्ने बताए । नेपालभित्र लुट मच्चाएर विदेश भाग्नेहरुकै कारण अर्थतन्त्र डामाडोल हुने अवस्थामा पुगेको उनले बताए । सत्ता र सरकारमा दलाल–भगौडा र छाेटे राजाहरु पुगेको भन्दै त्यसलाई विस्थापित नगर्दासम्म श्रमजीवि वर्गको सम्मान हुन नसक्ने बताए ।

उनले अहिले सत्तामा देश लुट्ने र प्राकृतिक सेत साधनमाथि दोहन गर्ने लुटेरा वर्गका मान्छे रहेकाले जनताको आर्थिक समस्या झन बढ्दै गएको उनले बताए । युवा शक्तिलाई विदेशमा बेचेर रमाउने शासककै कारण मुलुकको अवस्था खराब बन्दै गएको उनको भनाइ छ । किसानलाई पेन्सन दिनुपर्ने उनले बताए । ‘मेडिकल परीक्षणमा पास पाएर वैदेशिक रोजगारमा गएका युवायुवती किन लास भएर आउँछन् भन्दा राज्यले विदेशमा पुर्याएर मार्न लगाइएको छ, मारिएका कतिपयकाे लास समेत ल्याइएकाे छैन, यस्ता काम गर्ने नेता, शासकलाई के भन्ने ? अझै हामी चुप बस्न मिल्छ ? ’ उनले प्रश्न गरे ।

उनले स्वास्थ्य, शिक्षा लगायत नागरिकका आधारभूत सेवा क्षेत्रमा राज्यले काठमाडौंमा मात्र बजेट थुपारेर चरम अन्याय गरेका छन् । आजपाले मुलुकका समस्या समाधान गर्न संघर्षका कार्यक्रमसहित सडकमा जाने गरी महत्वपूर्ण निर्णय गरिने बताए । बैठकले शाेषित, पीडित र श्रमजीवि वर्गकाे रक्षा र उनीहरू नै सत्तामा सहभागी हुने व्यवस्था खडा गर्ने नीति तय गर्ने उनले बताए ।

उनले एमसीसी परियाेजना नेपालमा लागू हुन नदिने बताए । उनले गाैरहत्याकाण्डका पीडितहरूले नेपालमा न्याय नपाए अन्तर्राष्ट्रिय अदालत हेगमा जाने चेतावनी समेत दिए । पीडितहरुसँग सहमति गरेपनि कुर्सी हल्लिने भएपछि सरकार दाेषीलाइ कारवाही गर्नबाट पछि हटेको टिप्पणी गरे ।