महराका बाबु–छोरामाथि अनुसन्धान गर्न सरकारी वकिलको निर्देशन

११ भदौ, काठमाडौं । २०७९ पुस १० मा दुबईबाट ‘भेप’मा लुकाएर ९ किलो सुन तस्करी गर्ने समूहसँग साँठगाँठ रहेको पुष्टि भएका माओवादी केन्द्रका उपाध्यक्ष कृष्ण बहादुर महरा र उनका छोरा राहुलमाथि छानबिन गर्न जिल्ला सरकारी वकिलको कार्यालय काठमाडौंले निर्देशन दिएको छ । 

केन्द्रीय अनुसन्धान ब्यूरोले महरा र उनका छोरा राहुललाई सुन ल्याउने समूहका  ‘मुख्य योजनाकार’सँग प्रत्यक्ष मिलेमतो रहेको किटानीसहित बुझाएको अनुसन्धान प्रतिवेदनमा आधारमा उक्त निर्देशन दिएको हो । महराका बाबु–छोरामाथि तुरुन्तै अनुसन्धान गर्न निर्देशन भएको जिल्ला सरकारी वकिल कार्यालय स्रोतले बतायो । 

भेप प्रकरणमा समाचार निरन्तर आउने क्रम नरोकिएपछि महराले प्रकरणमा अनुसन्धान गर्न आफू प्रहरीलाई सघाउन तयार रहेको बताउँदै आएका छन् । उनले प्रकरणमा आफ्नो संलग्नता नरहेको र मुख्य योजनाकार भनिएका चिनियाँ दावा छिरिङसँग व्यापारिक कुरा मात्र भएको दाबी गर्दै आएका छन् ।

माओवादी केन्द्रका अध्यक्ष समेत रहेका प्रधानमन्त्री प्रचण्डले तस्करी र भ्रष्टाचारमा संलग्न देखिए आफ्नै पार्टीका मान्छेमाथि अनुसन्धान हुने बताउँदै आएका छन् । पार्टी अर्का उपाध्यक्ष समेत रहेका गृहमन्त्री नारायणकाजी श्रेष्ठले पनि अपराधमा दोषी देखिए आफ्नै पार्टीका नेता कार्यकर्तालाई नछाड्ने र हिरासत र जेल जान तयार हुनुपर्ने बताइरहेका छन् ।