एमसीसी सम्झौता कार्यान्वयन गर्न नदिने नेकपाको चेतावनी

११ भदौ, काठमाडौं । नेपाल कम्युनिष्ट पार्टी (नेकपा)का महासचिव नेत्रविक्रम चन्द ‘विप्लव’ले एमसीसी सम्झौता कुनैपनि मान्यतामा कार्यान्वयन गर्न नदिने बताएका छन् । 

आज पार्टीले काठमाडौंमा आयोजना गरेको अन्तक्र्रिया कार्यक्रममा बोल्दै महासचिव विप्लवले एमसीसी सम्झौता राष्ट्रघाती भएको र विरोधका बाबजुद कार्यान्वयन गरेको नाटक सुरु भएको बताए । 

‘एमसीसी कार्यान्वयन गर्ने नाटक गरिएको छ, कार्यान्वयनको नाटक गर्ने सबै राष्ट्रघातका मतियार हुन्’ उनले भने, ‘सम्झौता संसदहरुले पारित गरेपनि जनताले कुनैपनि हालतमा कार्यान्वयन गर्न दिने छैनन् । जनताले पारित गरेका छैनन् ।’ जबर्जस्त कार्यान्वयन गरेमा सडकमा आगो बल्ने चेतावनी दिए । 

सद्भाव र स्वच्छ मनले नेपालको विकासमा सहयोग गर्ने भए जनताको अनुमतिमा मात्र लगानी गर्न उनले एमसीसीसँग आग्ह गरे । अहिलेका सम्झौता अमेरिकाले आफ्नो सेना नेपालभित्र तैनाथ गर्ने योजनासाथ आएको बताए । ५५ अर्ब रुपैयाँको लोभ देखाएर नेपालमा सैन्य परेड खेल्ने दाउमा अमेरिका रहेको भन्दै राष्ट्रघाती तरिकाबाट खर्बौं रुपैयाँ दिएपनि अस्वीकार गर्ने उनले बताए । 

अमेरिकाले भनेकै ठाउँमा, उसकै सर्तमा उसले दिने पैसा खर्च गर्नुपर्ने बाध्यता सांसदहरु पर्नुपर्ने सम्झौता राष्ट्रघाती भएको पुष्टि भएको उनको भनाइ छ । एमसीसी नेपालीकाे शत्रु भएकाे भन्दै सम्झौताविरुद्धको आन्दोलनमा  एकजुट हुन उनले अपिल गरे । विदेशीको डलर र रकमको लोभमा परेर देशभित्र विदेशी सेना आउन दिने कुरा अस्वीकार्य भएको उनले बताए । उनले सम्झौताबारे नेपाली सेना, प्रहरी सबैले अध्ययन गनुपर्ने बताए ।

कार्यक्रममा नेकपाका प्रवक्ता खडगबहादुर विश्वकर्माले अमेरिका एमसीसीमार्फत नेपालमा सेना भौगोलिक सामरिक कब्जा गर्न आइरहेका भन्दै सम्झौतालाई जबर्जस्त कार्यान्वय गर्न खोजेमा नेपाली देशभक्त जनतासँगले धुलो चटाएर पठाइदिने बताए । 

उनले भने ‘अमेरिकाको पराजय एकाइसौं शताब्दीको तेस्रो दशकमा नेपालबाट हुन बेर छैन, त्यसको नेतृत्व नेकपाले गर्छ ।’