बुद्धभूमि नेपाल हाइड्रोपावरले मुनाफा बढायो

१२ भदौ, काठमाडौं । गत आर्थिक वर्षको चौथो त्रैमाससम्म आइपुग्दा बुद्धभूमि नेपाल हाइड्रोपावरको खुद नाफा ह्वातै बढेको छ । यसअवधिमा यस कम्पनीले १ करोड ११ लाख १३ हजार रूपैयाँ खुद नाफा कमाएको छ । अघिल्लो वर्षको यसैअवधिमा यसले १ करोड ४६ लाख ४० हजार रुपैयाँ घाटा व्यहोरेको थियो । एक वर्षको अवधिमा विद्युत बिक्रीबाट हुने आम्दानी बढेसँगै खुद नाफा बढेको हो ।

गत वर्ष १ करोड ३६ लाख १४ हजार रूपैयाँ रहेको विद्युत बिक्रीबाट हुने आम्दानी यो वर्ष १६ करोड ४४ लाख ८५ हजार रूपैयाँ पुगेको छ । अन्य स्रोतबाट यस कम्पनीले ८७ लाख ६७ हजार रूपैयाँ आम्दानी गरेको छ । अघिल्लो वर्षको यसैअवधिमा यसले अन्य स्रोतबाट ३ लाख रूपैयाँ आम्दानी गरेको थियो । 

असार मसान्तसम्म आइपुग्दा प्रतिसेयर आम्दानी २ रूपैयाँ ७८ पैसा र प्रतिशेयर नेटवर्थ ९१ रूपैयाँ ०२ पैसा छ । चुक्ता पुँजी ४० करोड रूपैयाँ छ । यता, जगेडा कोष भने ४ करोड ९२ लाख ३७ हजार रूपैयाँ ऋणात्मक छ ।