सामाजिक सदभाव खलबल्याउने खालका अभिव्यक्ति दिने सरकारको निगरानीमा छन्, कारवाही हुन्छः प्रधानमन्त्री

१२ भदौ,काठमाडौं । प्रधानमन्त्री पुष्पकमल दाहाल प्रचण्डले धर्म र संस्कृतिलाई बिथोल्ने र सामाजिक सद्‌भाव खलल गर्ने खालका अभिव्यक्ति दिनेहरू सरकारको निगरानीमा रहेको बताएका छन् । उनले यस्ता सामाजिक सद्‌भाव विथोल्नेहरु कारबाहीको भागीदार रहेको उनको भनाइ छ । 

प्रधानमन्त्री प्रचण्डले सरकार विधिको शासनमा पूर्ण प्रतिबद्ध रहेकाले यस्तो अपराधमा संलग्नहरुलाई कानुनको भागीदारी रहेको बताएका छन् । मंगलबार प्रतिनिधिसभा बैठकमा प्रश्नोत्तर कार्यक्रममा सांसद ईश्वरी देवी न्यौपानेको प्रश्नको जवाफमा उनले अनेकतामा एकता नेपाली मात्रको विशिष्टता भएको र यसलाई खलबल्याउने कुनै पनि गतिविधि रोकिने बताए ।

उनले सामाजिक एकता, सद्‌भाव र  सामाजिक सह अस्तित्वमा खलल पुर्याउने कुनै पनि किसिमको कार्य हुन नदिन सरकार दृढ रहेको बताए । उनले भने, ‘सामाजिक एकता, सद्‌भाव र सामाजिक सहअस्तित्वमा खलल पुर्याउने कुनै पनि किसिमको कार्य हुन नदिन सरकार दृढ छ । सामाजिक सद्‌भावमा खलल पार्ने र एकअर्काको धर्म र संस्कृतिमा द्वेषपूर्ण अभिव्यक्ति र कार्यलाई सरकारले कुनै हालतमा छुट दिन सक्दैन ।’

प्रधानमन्त्रीले पहिचानका कुरा गर्दा कसैको आस्थामाथि कुनै विभेद नगर्ने बताए । उनले आफूले पहिचानका कुरा गर्दा कसैको पहिचान, आस्थामाथि कुनै विभेद नगरेको बताएका छन् । प्रधानमन्त्री प्रचण्डले सामाजिक सञ्जालमा धार्मिक सहिष्णुतामाथि प्रहार भइरहेको तर्फ सरकार सचेत रहेको बताए । 

 प्रचण्डले भने– ‘नेपाल बहुभाषिक, बहुजातीय, विविधता बोकेको नेपालमा सदियौँदेखि विभिन्न जात, जाती, वर्ण, धर्म र संस्कृतिका जनताहरू आपसी सहकार्य र गहिरो सद्भावका साथ मिलीजुली बस्दै आएका छन् । अनेकतामा एकता नेपाली मात्रको विशिष्टता नेपाली मात्रको आधारभूत चरित्र पनि हो । सबैको सहअस्तित्व कायम गर्दै मौलिकताको संरक्षण र सम्वद्र्धनमा नै हाम्रो राष्ट्रिय एकता दिगो दरिलो भई साँचो अर्थमा राष्ट्रियता बलियो हुनेछ ।’

उनले नेपालको संविधानको पालना गर्नु हरेक नागरिकको समान दायित्व रहेको बताउँदै आफूले पहिचानको कुरा गर्दा अरु कसैको पहिचान आस्थामाथि कुनै खालको विभेद नगर्ने स्पष्ट पारे ।  उनले लोकतान्त्रिक विधि र पद्धति मार्फत सामाजिक न्याय र सुशासन सहितको समृद्धि हासिल गर्ने तरिकाले सरकारका सबै क्रियाकलापहरू केन्द्रित भएको बताए । उनले सरकार विधिको शासनमा प्रतिबद्ध रहेको स्पष्ट पारेका छन् ।