एमसीसी सम्झौता कार्यान्वयन घोषणाका लागि एमसीसी उपाध्यक्ष भोलि नेपाल आउँदै

१२ भदौ, काठमाडौं । अमेरिकी अनुदान परियोजना एमसीसी (मिलेनियम च्यालेन्ज कर्पोरेसन)को नेपालसँग सम्झौता कार्यान्वयन घाेषणा कार्यक्रममा सहभागी हुन एमसीसीका उपाध्यक्ष क्यामरन एस अलफोर्ड नेपाल आउँदैछन् । सम्झौता कार्यान्वयन भोलि भदौ १३ गते अर्गात अगष्ट ३० तारिखमा नेपाल आउने भएका हुन् । 

एमसीसीको कम्प्याक्ट अपरेसन विभाग प्रमुख रहेका उनी बुधबार अर्थ मन्त्रालयले आयोजना गर्ने कार्यक्रममा सहभागी हुन कतार हुँदै भोलि बेलुकी काठमाडौं आइपुग्ने कार्यक्रम छ । 

अर्थमन्त्रालयमा विवादस्पद सम्झौता औपचारिक रुपमा कार्यान्वयनमा जाने फाइलमा हस्ताक्षर गरिनेछ । हस्ताक्षरपछि सम्झौता कार्यान्वयनमा जाने एमसीए नेपालका मिडिया संयोजक पुष्कर माथेमाले जानकारी दिएका छन् । एमसीसी कार्यान्वयनको घोषणा अर्थ मन्त्रालयमा नेपाल र अमेरिकी अधिकारीहरुबीच ‘लेटर अफ एक्सचेन्च’ मार्फत गर्ने तयारी छ ।  

नेपालमा दुई दिन रहँदा क्यामरनले प्रधानमन्त्री पुष्पकमल दाहाल ‘प्रचण्ड’सहित प्रमुख राजनीतिक दलका नेताहरुलाई भेटघाट गर्नेछन् । उनीपछि अमेरिकी सिनेटको वैदेशिक मामिला तथा एप्रोप्रिएसन कमिटीका सदस्य सिनेटर क्रिस भान होलेन पनि सेप्टेम्बरको पहिलो हप्ता नेपाल आउँदैछन् । 

एमसीसी सम्झौताअनुसार अमेरिकाले नेपाललाई पाँच वर्ष लगाएर ५० करोड अमेरिकी डलर अर्थात् करिब ५५ अर्ब रुपैयाँ अनुदान दिने र त्यसमा नेपाल सरकारले एक चौथाई हाल्नुपर्ने सर्त छ । 

तर सम्झौतामार्फत अमेरिकाले आफ्नो सेना नेपालमा तैनाथ गर्ने योजना बनाएर राष्ट्रघात गर्न खोजेको भन्दै नेकपा लगायत सरकारमा रहेका दलका नेताहरुले विरोध जनाएरहेका छन् । विभिन्न दलहरुको विरोधका बाबजुद गत फागुनमा संसदीय दलहरुले १२ बुँदै व्याख्यात्मक टिप्पणीसहित संसदबाट पारित गरेका थिए । सम्झौतामा परियोजना कार्यान्वयनमा व्यवधान खडा भएमा नेपालको कानून भन्दा सम्झौताका प्रावधान माथि हुने सर्त राखिएको छ । 

एससीसी अमेरिकाकाे विदेश मन्त्रीकाे नेतृत्वमा संचालित सैन्य रणनीतिक परियाेजना हाे । सरकारमा बसेका तीन दलसँगको संयुक्त संगठन समाजवादी मोर्चामा आवद्ध नेकपाले भने केही अर्ब रुपैयाँको लोभमा सरकारले सम्झौतामार्फत अमेरिकालाई नेपालभित्र आफ्नो सेनाको अखडा बनाउन बाटो खोल्ने काम गर्न खोजेको भन्दै कार्यान्वयन गर्न नदिने घोषणा गरिसकेको छ ।