सांसदले उठाएका प्रश्नको जवाफमा मन्त्री गुरुङले भने- ‘ऐन कानुन अजर, अमर हुँदैनन्, संशोधन हुँदै जान्छन्’

१२ भदौ, काठमाडौं । कानुन, न्याय तथा संसदीय मामिला मन्त्री धनराज गुरुङले कुनैपनि ऐन, कानून अजर र अमर नहुने बताएका छन् । संसदमा पेस भएका केही नेपाल ऐन संशोधन गर्न ल्याइएको विधेयकमाथि मंगलबार प्रतिनिधिसभाको बैठकमा सांसदहरुले उठाएका प्रश्नको जवाफ दिँदै मन्त्री गुरुङले हरेक ऐन, कानुन समयाकुल सुधार र संशोधन हुने बताए । 

उनले सांसदहरुले उठाएका प्रश्नको जवाफमा संशोधित विधेयकले सामाजिक विषयमा न्याय दिने र अपराधिक र गलत कार्य गर्नेलाई दण्ड दिने गरी ल्याइएको बताए । विधेयकमा त्रुटी रहे सच्याएर आफू अगाडि बढ्ने उनले स्पष्ट पारे । 

उनले विधेयकको अन्यत्र राखिनुपर्ने संशोधन विषयलाई त्रुटिबस धारा ६४ मा पर्न गएको भन्दै सच्याउने बताए । ‘अन्यत्र्रै राख्नुपर्ने विषय धारा ६४ मा परेछ, क्यारम त नि’ मन्त्री गुरुङले भने, ‘त्यसैले त छलफल गर्न, केलाउन संसदमा पेस गरिएको हो । यो ऐतिहासिक त्रुटि चाहिं भनिहाल्नु पर्ने स्थिति होइन भन्ने लाग्छ ।’

उनले विधेयकलाई विषयगत समिति लगेर मसिनो गरी छलफल गरेरै पारित गर्नेमा आफू प्रष्ट रहेको बताउँदै समाजमा रहेका हरेक किसिमका विभेदलाई मेटाउन सबैले गहिरो रुपमा अध्ययन गर्न समेत अनुरोध गरे । 

विधेयकमाथि गगन थापा, तेजुलाल चौधरी, सुमाना श्रेष्ठ, प्रेम सुवाल, माधव सापकोटा, विद्या भट्टराई, प्रदीप पौडेल, सबिता गौतम, मनिष झा लगाउन दुई दर्जन भन्दा बढी सांसदहरुले सुधार गर्नुपर्ने सुझाव सहित संशोधनका आवश्यकताबारे प्रश्न उठाएका थिए । मन्त्री गुरुङको जवाफपछि विधेयक दफावार छलफलका लागि संसदको विषयगत समिति पठाइनेछ ।

विभिन्न ‘मुलुकी फौजदारी अपराध संहिता २०७४’को केही दफा संशोधनसहित विभिन्न ऐन समेतमा ८१ वटा कानुन संशोधनका लागि मन्त्री गुरुङले ‘केही नेपाल ऐन संशोधन विधेयक २०८०’ पेस गरेका थिए ।