एमसीसी सम्झौता कार्यान्वयनमा १२ बुँदे व्याख्यात्मक टिप्पणी सम्बोधन नभए मोर्चा संघर्षमा उत्रन्छ : प्रधानमन्त्री

१२ भदौ, काठमाडौं । प्रधानमन्त्री पुष्पकमल दाहाल ‘प्रचण्ड’ले अमेरिकी सहायता परियोजना (एमसीसी) सम्झौता कार्यान्वयनमा सदनबाट पास गर्दा गरिएको १२ बुँदे टिप्पणाी समावेश नगरिए सडक संघर्ष हुने बताएका छन् । 

समाजवादी मोर्चाले बुटवलमा मंगलबार रुपेन्देहीको बुटवलमा आयोजना गरेको सन्देश सभा सम्बोधन गर्दै सदनले राखेको टिप्पणीलाई सम्झौताको अंग बनाउनुको विकल्प नरहेको बताए । अंग नबनाइए सम्झौता कार्यान्वयन प्रक्रियामा जटिलता उत्पन्न हुने उनको भनाइ थियो । 

उनले यसबारे भोलि बुधबार नेपाल आउने एमसीसीका प्रतिनिधिसँग कुरा राख्ने बताए । गत फागुनमा संसदबाट पारित गरिएको एमसीसी परियोजना भोलि बुधबारबाट पूर्णरुपमा कार्यान्वनयमा जाँदैछ । औपाचारिक रुपमा कार्यान्वयनमा लैजान फाइलमा दुई पक्षीय हस्ताक्षरका लागि अर्थ मन्त्रालयले एक विशेष कार्यक्रम आयोजना गर्दैछ । सोही कार्यक्रममा सहभागी हुन एमसीसीका उपाध्यक्ष क्यामरन एस अलफोर्ड कतार हुँदै आज काठमाडाैं आइपुगेका छन् ।

सम्झौता नेपालको हितमा हुने गरी सदनबाट व्याख्यात्मक टिप्पणी भएको स्मरण गर्दै प्रधानमन्त्री प्रचण्डले यदि त्यसो नभए मोर्चा सडकमा जाने बताए । उनले आफू सधैं राष्ट्रिय हित, स्वाधिनता र सार्वभौमसत्ताको पक्षमा लडिरहेको र आगामी दिनमा पनि लड्ने बताए । 

मोर्चामा सम्मिलित चार घटकमध्ये नेकपाले एमसीसी सम्झौतालाई राष्ट्रघातीको संज्ञा दिँदै खारेजीका लागि संघर्ष गर्दै आइरहेको छ । नेपाली विशेषतासहितको समाजवादी  व्यवस्था  स्थापनाका लागि भन्दै केही महिनापहिले गठन भएको मोर्चामा नेकपा र सरकारमा रहेका दल माओवादी केन्द्र, जसपा,  एकीकृत समाजवादी सामेल छन् । उसले सात वटौ प्रदेशमा सन्देश सभा गर्ने घोषणा गरेको छ । यसअघि पर्साको वीरगन्जमा सभा गरिसकेको छ ।