काठमाडौं उत्रिए एमसीसीका उपाध्यक्ष अलफोर्ड

१२ भदौ, काठमाडौं । अमेरिकी विदेश मन्त्रीको नेतृत्वमा संचालित अनुदान परियोजना एमसीसी (मिलेनियम च्यालेन्ज कर्पोरेसन) का उपाध्यक्ष क्यामरन एस अलफोर्ड आज काठमाडौं आइपुगेका छन् । 

नेपालसँग भएको सम्झौता कार्यान्वयनको औपचारिक घोषणा कार्यक्रममा सहभागी हुन उनी मंगलबार त्रिभुवन अन्तर्राष्ट्रिय विमानस्थलमा उत्रिएका हुन् । अर्थ मन्त्रालयले भोलि बुधबार दिउँसो मन्त्रालयभित्र एक कार्यक्रम आयोजना गरेर सम्झौता कार्यान्वयनको फाइलमा दुई पक्षबीच हस्ताक्षर हुँदैछ । 

एमसीसीको कम्प्याक्ट अपरेसन विभाग प्रमुख समेत रहेका अलफोर्ड कतार हुँदै काठमाडौं उत्रिएका हुन् । सम्झौता कार्यान्वयनका लागि दरबार मार्गमा खडा गरिएको कार्यालय प्रमुख खडकबहादुर विष्टले भोलि भदौ १३ अर्थात अगष्ट ३० तारिखबाट सम्झौता औपचारिक रुपमा कार्यान्वयन हुने जनाएका छन् । 

नेकपा लगायत विभिन्न राजनीतिक दलहरूले सम्झौता राष्ट्रघाती भएको भन्दै खारेजीको माग गर्दै सडकमा विरोध कार्यक्रम चलाइरहेका छन् । विरोधका बाबजुद गएको फागुनमा संसदबाट सम्झौतालाई पारित गरेको थियो ।

यसै बीच प्रधानमन्त्री प्रचण्डले आजै मात्र एक सार्वजनिक कार्यक्रममा बोल्दै एमसीसी सम्झौता पारित गर्न सदनले गरेको १२ बुँदे व्याख्यात्मक टिप्पणी सम्बोधन नभए कार्यान्वयनमा जटिलता आउने बताएका छन् ।