एमसीसी सम्झौता कार्यान्वयनबारे माधव नेपालले भने- ‘देशभन्दा सत्ता प्यारो हुन सक्दैन’

१२ भदौ, बुटवल । सरकारका घटक नेकपा (एकीकृत समाजवादी)का अध्यक्ष माधवकुमार नेपालले एमसीसी सम्झौतामा सदनले गरेको १२ बुँदे व्याख्यात्मक टिप्पणी अमेरिकाले स्वीकार गर्नुपर्ने बताएका छन् । 

समाजवादी मोर्चाका एक घटक समेत रहेका एकीकृत समाजवादी अध्यक्ष नेपालले आज बुटवलमा आयोजना गरेको सन्देश सभामा सम्बोधन गर्दै १२ बुँदे टिप्पणी अमेरिकाले अस्वीकार गरेको भए त्यसबारे जनतालाई जानकारी दिनुपर्ने बताए । 

अमेरिकी अनुदान परियोजना (मिलिनियम च्यालेन्ज कर्पोरेसन) एमसीसीसँगको विकास सहयोग कार्यक्रमसम्बन्धी सम्झौता गत वर्ष यथास्थितिमा पास नहुने अवस्था आएपछि व्याख्यात्मक टिप्पणीसहित संसदबाट पारित गर्नुपर्ने बाध्यता आफूहरुलाई आइलागेको उनले स्वीकारे । उनले सावैभौम संसदले गरेको उक्त टिप्पणी सम्झौताको अंग बन्नुपर्ने बताए । 

सम्झौता भोलि भदौ १३ गतेबाट औपचारिक रुपमा कार्यान्वयनमा जाने नेपालस्थित एमसीसीए नेपाल शाखाले जनाएको छ । कार्यान्वयनमा लैजाने क्रममा औपचारिक घोषणा कार्यक्रममा हस्ताक्षर गर्न एमसीसीका उपाध्यक्ष क्यामरुन एलफोर्ड मंगलबार अपरान्ह काठमाडौं आइसकेका छन् । उनी बुधबार अर्थ मन्त्रालयमा आयोजना गरिने कार्यक्रममा सहभागी हुने शाखाले जनाएको छ । 

सम्झौता राष्ट्रघाती भएको भन्दै विभिन्न राजनीतिक दलहरुले चर्को विरोध गरेपछि तत्कालीन संसदमा रहेका दलहरुले व्याख्यात्मक टिप्पणी गरेर संसदबाट पारित गरेको थियो । तर उक्त टिप्प्णीलाई अमेरिकाले नसुनेझैं गर्दै आइरहेको छ । विकासको नाममा अमेरिका नेपालभित्र आफ्नो सैन्य अखडा तयार पार्ने आएको भन्दै खारेज हुनुपर्ने माग सहित प्रदर्शन भइरहेको छ ।

सम्झौता पारित गराउन सदनमा ताली बजाएका नेपाल, प्रधानमन्त्री प्रचण्ड र जसपाका अध्यक्ष उपेन्द्र यादवले सम्झौताको कट्टर विरोधी नेकपाका महासचिव विप्लवसँग मिलेर केही समयपहिले मात्र चार पार्टी सम्मिलित समाजवादी मोर्चा गठन गरेका थिए । 

मोर्चाले आज आयोजना गरेको सभामा अध्यक्ष नेपालले संसदको व्याख्यात्मक टिप्प्णी अमेरिकाले नमानेको भए जनतालाई बताउ सभा मञ्चमा रहेका प्रधानमन्त्री प्रचण्डसँग आग्रह गरे । आफूहरुले नेपालको हितविपरीतका कुनैपनि सर्त नमान्ने भनेर टिप्पणी गरेको उनले स्मरण गराए । 

उनले एमसीसी अमेरिकाको इन्डोप्यासिफिक स्ट्राटेजीको अंग हुन रहेमा अस्वीकार गर्ने बताए । कुनैपनि सम्झौता नेपालको कानुनभन्दा माथि हुन नसक्ने भन्दै त्यसैलाई मध्यनजर गरेर व्इाख्यात्म टिप्पणी गरिएको बताए । उनले आफूले भोलि भदौ १३ गतेदेखि सम्झौता कार्यान्वयन हुने कुरा सुनेको बताए । राष्ट्रियताको विषय अगाडि आउँदा देशभन्दा ठूलो सत्ता हुन नसक्ने भन्दै अध्यक्ष नेपालले सम्झौता गलत ढंगले कार्यान्वयन भएमा सत्ता छाड्न केहीबेर नलाग्ने बताए ।

सम्झौतामा सम्झौता कार्यान्वयन हुन नसकेको खण्डमा नेपालले क्षतिपूर्ति तिर्नुपर्ने, समस्या समाधानका लागि चालिने कानूनी प्रक्रिया नेपालको कानूनभन्दा सम्झौताका प्रावधान माथि हुने जस्ता प्रावधान समावेश छन् ।