६० किलो सुन तस्करीको अनुसन्धानमा एआईजीको कमाण्डमा विशेष व्यूरोका डीआईजी सहभागी

१२ भदौ, काठमाडौं । राजश्व अनुसन्धान विभागले बरामद गरेको ६० किलो सुन तस्करी प्रकरणको अनुसन्धान लागि काठमाडौं बाहिर रहेका अनुसन्धानमा पोख्त अधिकृतहरूलाई सहभागी गराइएको छ । प्रहरी महानिरीक्षक वसन्त कुँवरले सीआईबी प्रमुख एआईजी किरण बज्राचार्यलाई कमाण्डर बनाएर काठमाडौं बाहिर रहेका अनुसन्धान अधिकृतलाई सहभागी गराइएको हो । साथै विशेष व्यूरोका डीआईजी रामदत्त जोशीलाई र उनको टीमलाई पनि सहभागी गराइएको छ । 

राजश्व अनुसन्धान विभागले ६० किलो सुन बरामद गरेर आफैँ अनुसन्धान सुरु गरेको थियो । तर गृहमन्त्री नारायणकाजी श्रेष्ठको जोडबलमा संगठित अपराध अनुसन्धानमा सीआईबीलाई जिम्मा लगाएपछि अनुसन्धानका लागि अनुसन्धान अधिकृतहरू थप गरिएको हो ।

प्रहरी महानिरीक्षकले करिब ४० दिनपछि अनुसन्धानमा पोख्त अधिकृत समेत खटाएपछि  परिणाम आउने अपेक्षा गरिएको छ । सीआईबीले अनुसन्धानको जिम्मा साउन २१ मा लिएको थियो  । अनुसन्धानको जिम्मा लिएको एक महिना पुग्न लाग्दा अनुसन्धानमा दक्ष अधिकृतहरूलाई सहभागी गराएर अनुसन्धानको दायरा फराकिलो बनाइएको छ । सुरुमा सीआईबीले एसपी सञ्जयसिंह थापाको कमान्डमा अनुसन्धान सुरु गरेको थियो । तर अहिले सीआईबीले अन्तर्राष्ट्रिय सञ्जालसम्म अनुसन्धान थालेपछि थप अनुसन्धान टोली खटाइएको छ । धनकुटाबाट एसपी कृष्ण प्रसाद कोइरालालाई बोलाएर अनुसन्धानमा खटाइएको छ । उनी धनकुटाबाट सीआईबी आउने भएका छन् । 

सीआईबीले अनुसन्धानको जिम्मा लिएपछि तस्करीमा संलग्न भनिएका मुख्य चिनियाँहरु पक्राउ परिसकेका छन् । केही व्यक्ति फरार रहेको सीआईबीले जनाएको छ । उनीहरूलाई कानुनी दायरामा ल्याउन इन्टरपोलमार्फत चीन र हङकङका प्रहरीसँग समन्वय गरिएको छ । भारतीय प्रहरीसँग पनि यस विषयमा समन्वय गरिरहेको सीआईबीले जनाएको छ ।

इन्टरपोलकै समन्वयमा नेपाल प्रहरीले अनुसन्धान एसएसपी दिनेश आचार्यलाई हङकङ पठाइसकेको छ । एसएसपी दिनेश आचार्य मंगलबार राती हङकङ पुगेका छन् । उनले त्यहाँ इन्टरपोलको उपव्यूरोमा सहभागी भएर अनुसन्धान गर्नेछन् ।