मन्थलीमा विद्युतीय चार्जिङ स्टेसन सञ्चालनमा

१३ भदौ, काठमाडौं । रामेछापको मन्थलीमा पहिलो पटक विद्युतीय चार्जिङ स्टेसन संचालनमा आएको छ । पछिल्लो समयमा विद्युतीय सवारी आउने जाने क्रम बढेसँगै रामेछापको सदरमुकाम मन्थलीमा विद्युत चार्जिङ स्टेसन सञ्चालनमा ल्याएको हो । 

व्यवसायी प्रमोद श्रेष्ठले करिब ४ लाख लगानीमा ७ आना क्षेत्रफलमा दुई वटा विद्युतीय चार्जिङ स्टेसन सञ्चालनमा ल्याएका हुन् । रामेछापमा मात्र हाल डेढ दर्जनभन्दा बढी चार पांग्रे विद्युतीय सवारी साधन सञ्चालनमा छन् । 

सिन्धुलीको खुर्कोटमा रहेको विद्युतीय चार्जिङ स्टेसनबाट चार्जिङ सेवा लिन अपायक भएपछि मन्थलीमा संचालन गरिएको हो । एक प्रतिशत चार्ज गर्न ७ रुपैयाँ शुल्क निर्धारण गरिएको छ । एउटा गाडी चार्ज गर्न करिब एक घण्टा समय लाग्ने जनाइएको छ । काठमाडौंबाट सदरमुकाम मन्थली १४० किलोमिटरको दूरीमा रहेको छ । एक पटकको चार्जले १२० किमि पार गर्न पुग्ने जनाइएको छ ।