शशांक कोइरालाले कारागार पुगेर भेटे पूर्वगृहमन्त्री बालकृष्ण खाँणलाई

१३ भदौ, काठमाडौं । नेपाली कांग्रेसका नेता डा. शशांक कोइरालाले नक्कली भुटानी शरणार्थी प्रकरणमा मुद्दा पुर्पक्षका लागि केन्द्रीय कारागारमा रहेका पूर्वगृहमन्त्री बालकृष्ण खाँणलाई भेटेका छन् । केन्द्रीय सदस्य समेत रहेका खाँणलाई आज बिहान कारागार सुन्धारामा पुगेर भेट गरेका हुन् । 

खाँण र कोइरालाबीच करिब २० मिनेट कुराकानी भएको थियो ।  कोइरालासँग अन्य दुई जना पुगेका थिए ।नक्कली भुटानी शरणार्थी प्रकरणको अनुसन्धानका क्रममा गत वैशाख २७ मा पक्राउ परी मुद्दा चल्दा जिल्ला अदालत काठमाडौंको आदेशमा खाँण असार १ देखि पुर्पक्षका लागि कारागारमा छन् । 

खाणलाई गृहमन्त्री रहेका बेला नेपालीलाई नक्कली भुटानी शरणार्थी बनाएर अमेरिका उडाउने प्रलोभन ४२९ जनाबाट २८ करोडभन्दा बढी रकम उठाएर संगठित रुपमा ठगी कसुर गरेको अभियोग छ । सोही मुद्दा कांग्रेस नेता आङटावा शेर्पासहित थुप्रै जना पुर्पक्षका लागि जेलमा छन् ।