६० किलो सुन तस्करी प्रकरणमा थप १ जना पक्राउ

१३ भदौ, काठमाडौं । गत साउन २ मा त्रिभुवन अन्तर्राष्ट्रिय विभानस्थलबाट भित्रिएको तस्करीको ६० किलो सुन प्रकरणमा सीआईबीले थप एक जना पक्राउ गरेको छ । 

पक्राउ पर्नेमा पाल्पाका गणेश पौडेल रहेका छन् ।  उनलाई मंगलबार पक्राउ गरिएपनि कुन ठाउँबाट भन्ने सीआईबील खुलाएको छैन । पौडेलसँगै प्रकरणमा पक्राउ पर्नेको संख्या २४ पुगेको छ ।

यसअघि भन्सार विभाग र सीआईबी गरी ७ चिनियाँ नागरिकसहित २३ जना पक्राउ परिसकेका छन् । उनीहरुलाई तस्करी, ंगठित अपराध कसुरमा अनुसन्धान जारी राखेको छ ।

हङकङबाट नेपाल काठमाडौं आएको विमानबाट मोटरसाइकलको ब्रेकशुमा लुकाएर उक्त परिमाणको सुन तस्करी गरेको पाइएको थियो । विमानस्थलबाट पार गरिसकेको अवस्थामा अवैध सुन भन्सार विभागले साउन ३ मा सिनामंगलबाट बरामद गरेको थियो ।

कार्टुनमा राखेर ल्याइएको ब्रेकशु नेपाल राष्ट्र बैंकको तक्सार विभागले सुरक्षाकर्मी लगायतको रोहबरमा पगाल्दा ६० केजी ७१६ ग्राम सुन ठहरिएको थियो । तस्करीमा अन्तरदेशीय संजाल जोडिएको पाइएपछि भन्सार विभागको अनुमतिले सीआईबीले अनुसन्धान गरिरहेको हो ।

यो पनि पढ्नुहोस