बोदेबर्साइनका मेयर र प्रशासकीय अधिकृतविरुद्ध भ्रष्टाचार मुद्दा दर्ता

१३ भदौ, काठमाडौं । अख्तियार दुरुपयोग अनुसन्धान आयोगले सप्तरीको बोदेबर्साइन नगरपालिकाका मेयर र प्रमुख प्रशासकीय अधिकृतसहित ५ जनाविरुद्ध विशेष अदालतमा भ्र्रष्टाचार कसुरमा मुद्दा दर्ता गराएको छ । 

मेयर आतेशकुमार सिंह र नगरपालिकाका निमित्त प्रमुख प्रशासकीय अधिकृत घनश्याम यादवविरुद्ध प्रधानमन्त्री कृषि आधुनिकरण परियोजना अन्तर्गत बाख्रापालनको अनुदानमा भ्रष्टाचार गरेको अभियोग लागेको छ । 

बाख्रा व्यवसायी पकेट कार्यक्रमका लागि वडा नं ६ फुलकाहीको माँ जगदम्बा कृषक समूहसँग सम्झौता गरी छुट्याइएको रकम कामै नगरी भुक्तानी गरेको पाइएपछि करिब १५ लाख रुपैयाँ भ्रष्टाचार गरेको निष्कर्षसहित अख्तियारले बुधबार मुद्दा दताए गराएको हो । नक्कली बिल भर्पाई र झुटा बिल बनाएर १४ लाख ७१ हजार ९२१ रुपैयाँ नगरपालिकाले भुक्तानी गरेको अख्तियारको दाबी छ ।

नगरपालिकाका पशुविकास अधिकृत अर्जुनप्रसाद यादव, माँ जगदम्बा कृषक समूहका अध्यक्ष राधेश्यामकुमार साह र कोषाध्यक्ष निलमकुमारी शर्माविरुद्ध पनि भ्रष्टाचार मुद्दा दायर गराइएको छ ।