एमसीसी सम्झौता कार्यान्वयनविरुद्ध ४ पार्टीले देशव्यापी आज विरोध प्रदर्शन गर्दै

१३ भदौ, काठमाडौं । एमसीसी सम्झौता कार्यान्वयन रोक्न माग गर्दै चार पार्टीले आज देशव्यापी रुपमा विरोध प्रदर्शन गर्ने घोषणा गरेका छन् । आजबाट सम्झौता कार्यान्वयनमा जाने भएपछि ति पार्टीहरुको आज आकस्मिक बैठक बसेर प्रदर्शनको घोषणा गरिएको हो । 

नेपाल कम्युनिस्ट पार्टी, क्रान्तिकारी कम्युनिस्ट पार्टी नेपाल, नेपाल कम्युनिस्ट पार्टी र वैज्ञानिक समाजवादी कम्युनिस्ट पार्टी नेपालले एमसीसी सम्झौता खारेजीको माग गर्दै काठमाडौंको माइतीघर मण्डलाबाट दिउँसो ३ बजे संयुक्त विरोध प्रदर्शन गर्दैछन् । 

सम्झौता राष्ट्रघाती रहेको भन्दै चार पार्टीका नेतृत्वहरुले संयुक्त प्रेस विज्ञप्ति जारी गरेर संघर्षमा उत्रन अपिल समेत गरेका छन् । नेपाल कम्युनिस्ट पार्टीका महासचिव विप्लव, क्रान्तिकारी कम्युनिस्ट पार्टी नेपालका अध्यक्ष किरण, नेपाल कम्युनिस्ट पार्टीका अध्यक्ष ऋषि कट्टेल, वैज्ञानिक समाजवादी कम्युनिस्टका महासचिव आहुतीले संयुक्त प्रेस विज्ञप्ति जारी गरेका हुन् । सम्झौता केही अर्ब रुपैयाँको लोभमा अमेरिकी साम्राज्य भित्र्याउन गरिएको भन्दै चार पर्टीले सम्झाैताकाे सुरूदेखि नै विराेध गर्दै आएका छन् ।

बुधबार ७७ वटै जिल्लामा दिउँसो एकै समयमा विरोध प्रदर्शन हुने नेकपाले जनाएको छ । राष्ट्रको हितविपरीतका एमसीसी परियोजना जनताको बलमा खारेज गर्नुको विकल्प नरहेको विज्ञप्तिमा जनाइएको छ । सम्झौता आजबाट औपचारिक रुपमा कार्यान्वयनमा जाँदैछ ।

त्यसनिम्ति घोषणा कार्यक्रममा सहभागी हुन एमससीका उपाध्यक्ष क्यामरुन एलफोर्ड मंगलबार नै नेपाल आइसकेका छन् । अर्थ मन्त्रालयमा सम्झौताका दुई पक्षीय उपस्थितिमा कार्यान्वयन फाइलमा हस्ताक्षर हुँदैछ ।