एमसीसी सम्झौता कार्यान्वयनविरुद्ध ४ पार्टी सडकमा, विरोधसभामा विप्लवले सम्बोधन गर्ने

१३ भदौ, काठमाडौं । अमेरिकी सहयोग परियोजना (एमसीसी) सम्झौता औपचारिक रुपमा कार्यान्वयन आएपछि नेकपासहित ४ पार्टी सडक प्रदर्शनमा उत्रिएका छन् । 

बुधबार विप्लव नेतृत्वको नेपाल कम्युनिस्ट पार्टी, मोहन वैद्य नेतृत्वको क्रान्तिकारी कम्युनिस्ट पार्टी, ऋषिराम कट्टेल नेतृत्वको नेकपा, आहुति नेतृत्वको वैज्ञानिक समाजवादी पार्टीले संयुक्त रुपमा काठमाडौंमा प्रदर्शन गरेका छन् । 

‘साम्राज्यवादी एमसीसी परियोजना कार्यान्वयन विरुद्ध विरोध प्रदर्शन’ लेखिएको ब्यानरसहित पार्टीका शीर्ष नेताहरु सडकमा उत्रिएका हुन् । मााइतीघर मण्डलादेखि नयाँ बानेश्वरसम्म र्यालीसहित प्रदर्शन गरेका छन् । 

अहिले विरोध सभाको तयारी गरिएको छ । प्रदर्शनको नेतृत्व विप्लव, धर्मेन्द्र बाँस्तोला, ऋषिराम कट्टेल लगायतले गरेका छन् । विरोध सभामा उनीहरुले सम्बोधन गर्नेछन् । चार पार्टीले सम्झौतालाई राष्ट्रघातीको संज्ञा दिएका छन् । सम्झौतामार्फत अमेरिका नेपालभित्र आफ्नो सेना अखडा तयार पार्ने र राष्ट्रियतामाथि क्रिडास्थल मच्चाउने योजनामा आर्थिक सहयोगका कार्यक्रमसहित आइरहेको चार पार्टीको निष्कर्ष छ । 

कुनैपनि हालतमा सम्झौता कार्यान्वयन हुन नदिने नेताहरूको भनाइ छ । प्रदर्शन देशभर भइरहेको नेपाले जनाएको छ । चार पार्टीका शीर्ष नेतृत्वले संयुक्त विज्ञप्ति निकालेर कार्यान्वयन विरुद्धको आन्दोलनमा एकजुट हुन समेत अपिल गरेका छन् ।